काठमाडौं – नेपाल प्रिमियर लिगमा सहभागी फ्रेन्चाइज क्रिकेट टोली लुम्बिनी लायन्सले सोमबार आफ्नो नयाँ लोगो सार्वजनिक गरेको छ। सार्वजनिक लोगो टोलीले क्रिकेट, संस्कृति र राष्ट्रिय गौरवलाई एउटै चिन्हमा समेट्ने प्रयास गरेको छ।
टोलीका अध्यक्ष ईश्वर बहादुर जीसीले लोगो सार्वजनिक गर्दै भने ‘यो लोगो हाम्रो टिमको बल मात्र होइन, लुम्बिनीको गौरवको पनि प्रतीक हो। बुद्धको पवित्र भूमिमा जन्मिएको यो टोली मैदानमा गर्जन्छ र नेपाललाई विश्व नक्शामा चिनाउँछ।’
उनले नयाँ लोगोले खेलकुदमार्फत राष्ट्रिय पहिचान प्रवर्द्धन गर्ने लक्ष्य बोकेको स्पष्ट पारे । लुम्बिनी लायन्सले खेल, संस्कृति र राष्ट्रिय भावना समेटेर यो लोगो तयार पारेको हो, उनले भने ।
लोगोले लुम्बिनीको सांस्कृतिक, ऐतिहासिक र अध्यात्मिक गहिराइलाई समेट्नुका साथै क्रिकेट मैदानमा नेपालको शान्तिपूर्ण तर शक्तिशाली प्रतिनिधित्व गर्ने विश्वास टोलीले व्यक्त गरेको छ।
२०८१ सालमा स्थापना भएको लुम्बिनी लायन्स अब नेपाल प्रिमियर लिगमा भाग लिन तयारी अवस्थामा छ। नयाँ लोगो सार्वजनिक गर्दै टोलीले आफ्नो यात्रा नयाँ ऊर्जा र उत्साहसाथ अघि बढाउने प्रतिबद्धता व्यक्त गरेको छ।
