भैरहवा – सहकारी ठगी, संगठित अपराध र सम्पत्ति शुद्धिकरणको अभियोगमा पुर्पक्षका लागि थुनामा रहेका राष्ट्रिय स्वतन्त्र पार्टी (रास्वपा) का सभापति रवि लामिछानेले २ करोड ७४ लाख ८४ हजार रुपैयाँ बराबरको बैंक जमानत बुझाएका छन्।
रुपन्देही जिल्ला अदालतमा लामिछानेले चार दिनअघि उक्त बैंक जमानत बुझाएका हुन्। जिल्ला अदालत रुपन्देहीका सूचना अधिकारी पदम अर्यालका अनुसार लामिछानेले निवेदन दिएको दिनमै बैंक जमानत पनि अदालतमा पेश गरिएको हो। अब इजलासको निर्णयपछि मात्रै रिहा हुने या नहुने टुंगो लाग्ने बताइएको छ।
पूर्व गृहमन्त्रीसमेत रहेका लामिछानेलाई बुटवलस्थित सुप्रिम सहकारीको ठगी प्रकरणमा जिल्ला अदालत रुपन्देहीले १ करोड रुपैयाँ धरौटीमा रिहा गर्न आदेश दिएको थियो। तर उच्च अदालत दाङको बुटवल इजलासले उक्त आदेश उल्टाउँदै थुनामा राख्न निर्देशन दिएको थियो। त्यसपछि सर्वोच्च अदालत पुगेका लामिछानेलाई त्यहाँबाट पनि थुनामै राखेर मुद्दाको पुर्पक्ष गर्न आदेश दिइएको थियो।
उता लामिछानेले आफूमाथि राजनीतिक प्रतिशोधका आधारमा कारबाही गरिएको दाबी गर्दै मुलुकी फौजदारी कार्यविधि संहिता, २०७४ को दफा ६८ र ७१ अनुसार बैंक जमानतमा रिहा गरिनुपर्ने मागसहित साउन ५ गते निवेदन दर्ता गरेका हुन्।
स्रोतका अनुसार रास्वपाले थालेको चन्दा संकलन अभियानबाट संकलित रकम लामिछानेकै जमानतका लागि प्रयोग गरिएको छ। उठेको रकम उनकी पत्नी निकिता पौडेल लामिछानेको बैंक खातामा जम्मा गरेर त्यसलाई बैंक जमानतको रूपमा अदालतमा बुझाइएको जनाइएको छ।
अब जिल्ला अदालतको इजलासबाट आउने निर्णयले रवि लामिछानेको रिहाइ हुने या पुर्पक्षका लागि थुनामै राखिने भन्ने अन्तिम टुंगो लाग्नेछ।
