काठमाडौं — कोशी प्रदेशका सांसद अमृत अर्यालले नेपाली राष्ट्रिय क्रिकेट टिमका खेलाडी ललित राजवंशीको घर निर्माण गरिदिने घोषणा गरेका छन्।
सोमबार राजवंशीको घरमै पुगेर सांसद अर्यालले जनता आवास कार्यक्रम अन्तर्गत कोशी प्रदेशका सांसदहरूलाई तोकिएका ६ घरमध्ये एउटा राजवंशीका लागि निर्माण गरिने बताए।
उनका अनुसार राजवंशीको घर जीर्ण अवस्थामा रहेको र निर्माणका लागि आवश्यक रकम नभएकाले कार्यक्रममार्फत सहयोग गर्न लागिएको हो।
जनता आवास अन्तर्गत निर्माण हुने घरको लागत ४–५ लाख रुपैयाँ हुने र यसमा दुई कोठा, बरण्डा तथा शौचालय रहने अर्यालले जानकारी दिए। यो घर यसै आर्थिक वर्षभित्र निर्माण सम्पन्न गर्ने लक्ष्य राखिएको छ।
