आर्यतारा शाक्य नयाँ कुमारी छनोट भएकी छन्। शाक्य महाबिहार संघले अढाई वर्षीया आर्यतारालाई नयाँ कुमारी छनोट गरेको हो।
काठमाडौँको इटुम्बहालकी आर्यतारालाई मंगलबार दिउँसो १२:०५ बजेदेखि १२:१६ बजेको बीचको शुभ साइतमा कुमारीको आसन ग्रहण गराउने कार्यक्रम तय भएको छ।
त्यही दिन हालकी कुमारी तृष्णा शाक्यलाई बाजागाजासहित बिदाइ गर्ने तयारी गरिएको संघले जनाएको छ।
संघले काठमाडौँका १५ बहाललाई पत्र पठाएर नयाँ कुमारीका लागि नाम सिफारिस गर्न आह्वान गरेको थियो। प्राप्त नामावलीहरुमध्येबाट निर्णायक मण्डल, गुठी संस्थान र पञ्चाङ्ग निर्णायक समितिको समेत सल्लाहमा आर्यतारा शाक्य नयाँ कुमारीका रूपमा छनोट भएकी हुन्।
कुमारीलाई जीवित देवीको रुपमा पुज्ने प्रचलन छ। काठमाडौँमा यो परम्परा झण्डै २७० वर्षअघिदेखि चलिआएको छ।
कुमारीलाई महालक्ष्मीको प्रतिक मानिन्छ। जयप्रकाश मल्लले कुमारी प्रथाको स्थापना गरेका हुन्।
