फर्पिङ — दक्षिणकाली नगरपालिकामा ‘दोस्रो शहीद मानबहादुर स्मृति कप २०८२’ वडास्तरीय फुटबल प्रतियोगिता माघ ३ गतेदेखि सुरु हुने भएको छ। शहीद मानबहादुर स्मृति प्रतिष्ठानको आयोजना तथा दक्षिणकाली नगरपालिकाको सहकार्यमा हुने प्रतियोगिता फर्पिङस्थित त्रिभुवन आदर्श मावि (TAMV) खेल मैदानमा ९–ए–साइड फर्म्याटमा खेलाइनेछ।
नगरपालिकाका ९ वटै वडाको सहभागिता रहने प्रतियोगिताको विजेताले १ लाख ५१ हजार १११ रुपैयाँ नगद, ट्रफी र मेडल प्राप्त गर्नेछ भने उपविजेतालाई ७५ हजार ५५५ रुपैयाँसहित ट्रफी र मेडल प्रदान गरिनेछ। प्रतियोगिताका उत्कृष्ट खेलाडीहरूलाई विधागत रूपमा नगद पुरस्कारसमेत दिइने आयोजकले जनाएको छ।
प्रतियोगिताको उद्घाटन खेल माघ ३ गते दिउँसो १२:१५ बजे वडा नं. ८ र वडा नं. १ बीच हुनेछ। स्थानीयस्तरमा खेलकुद प्रवर्द्धन र शहीदको सम्मानका लागि आयोजना गरिएको यो प्रतियोगितालाई दक्षिणकाली क्षेत्रकै प्रमुख फुटबल इभेन्टका रूपमा हेरिएको छ।
तस्वीर: सुजन श्रेष्ठ
