काठमाडौँ – स्टेट पार्टनरसिप प्रोग्राम (एसपीपी) लाई नेपालले अस्वीकार गरेको भन्ने पत्र आफूलाई प्राप्त भइसकेको अमेरिकाले जनाएको छ ।
परराष्ट्रमन्त्री नारायण खड्काले प्रतिनिधिसभामा शुक्रबारै बोल्दै परराष्ट्र मन्त्रालयले साउन ९ मा एसपीपीमा सहभागी नहुने भन्दै अमेरिकी सरकारलाई पत्राचार गरिसकेको जानकारी दिएका थिए ।
‘ एसपीपीको सम्बन्धमा नेपाल सरकारबाट आधिकारिक लिखित सन्देश प्राप्त गरेका छौं । हामी एसपीपीमा सरकार (नेपाल) को निर्णयलाई बुझ्छौं र पूर्णरूपमा स्वीकार गर्छौं ।’ दूतावासले भन्यो।
तर, अमेरिकालाई औपचारिक पत्र नपठाएको भन्दै सरकारको आलोचना भैरहेका बेला सरकारले औपचारिक रुपमा पत्र पठाएको जानकारी दिएको हो ।
‘कूटनीतिक माध्यमबाट नेपालले एसपीपीलाई अघि नबढाउने निर्णय गरेको लिखित जानकारी अमेरिकी सरकारसमक्ष पठाएको सम्मानित सदनमा जानकारी गराउन चाहन्छु ।’शुक्रबार संसदमा परराष्ट्रमन्त्री खड्काले भने– आन्तरिक परामर्श आवश्यक भएकाले केही समय लागेको हो ।’
पत्राचार गर्न ढिला गरेको भन्दै कतिपयले संशयसमेत व्यक्त गरेकोमा पनि उनले त्यसो गर्नु आवश्यक नरहेको बताए । ‘यसमा नेपाल सरकारको दृष्टिकोण स्पष्ट थियो र छ ।’ उनले भने । स्वतन्त्र, सन्तुलित परराष्ट्र नीति सञ्चालनका लागि सरकारसक्षम रहेको मन्त्री खड्काले बताए ।
