काठमाडौं– वणिज्य, आपूर्ति तथा उपभोक्ता हित संरक्षण विभागले केही दिन महँगो मूल्यमा प्याज नकिन्न उपभोक्तालाई आग्रह गरेको छ ।
बजारमा प्याजको कृत्रिम अभाव सिर्जना गरेर उपभोक्ता ठगी भइरहेको र विभागले कारबाही तीव्र्र बनाएकाले तत्कालै मँहगो मूल्यमा प्याज नकिन्न विभागले आग्रह गरेको हो ।
विभागका निर्देशक एवम् सूचना अधिकारी रवीन्द्र आचार्यले व्यापारीले प्याज लुकाएकाले केही दिन महँगो मूल्यमा प्याज नकिन्न अनुरोध गरेका हुन् ।
छिट्टै बिग्रन सक्ने कारणले गर्दा प्याज धेरै समय लुकाउन नसक्ने उनको भनाइ छ । लुकाएको प्याज खोज्न र बढी मूल्य लिने पसलेललाई कारवाही गर्न स्थानीय तह, जिल्ला प्रशासन कार्यालय र विभाग पनि पूर्ण रुपमा लागेको निर्देशक आचार्यले बताए ।
