डडेल्धुराका ३ सहित थप २६ जनामा कोरोना पुष्टि

डम्बर निदाल
डडेल्धुरा – डडेल्धुरा अस्पतालको प्रयोगशालामा गरिएको कोरोना परिक्षणमा डडेल्धुराका ३ सहित सुदूरपश्चिम प्रदेशमा थप २६ जनामा कोरोना भाइरस (कोभिड–१९) को पुष्टि भएको छ । शुक्रवार डडेल्धुरा अस्पतालको प्रयोगशालामा गरिएको परीक्षणमा सुदुरपश्चिमका पहाडी जिल्लाका विभिन्न स्थानवाट सकंलन गरिएका स्वाव नमुना मध्ये २६ नमुनाहरुमा कोरोना संक्रमण देखिएको हो ।
अस्पतालका मेडिकल ल्याब टेक्नोलोजिष्ट जिनी गणेजुले शुक्रबार एक सय ८६ जनाको नमूना परीक्षण गर्दा डडेल्धुराका ३, बैतडीका २ र दार्चुलाका २१ जनामा संक्रमण पुष्टि भएको जनाएका छन् ।
शनिवार अस्पतालवाट सार्वजनिक गरिएको सुचनामा डडेल्धुरा नवदुर्गा गाउँपालिका का २ जना र अमरगढी नगरपालिकाका १ जनामा कोरोना भाईरसको संक्रमण पुष्टि भएको छ । यसै गरी बैतडी पाटन नगरपालिकाका २ जना, दार्चुला मार्मा गाउँपालिकाका २० जना र दार्चुलाकै महाकाली नगरपालिकाका १ जनामा कोरोना पुष्टि भएको अस्पतालले सार्वजनिक गरेको सुचनामा उल्लेख गरीएको छ ।