शैक्षिक शत्र सुरु भएको धेरै दिन वितिसक्दा पनि सरकारी स्वामित्वको जनकशिक्षा सामग्री केन्द्रले सामुदायिक विद्यालयका विद्यार्थीहरुलाई पाठ्यपुस्तक पुर्याउन नसकेकोमा मुद्रण व्यवसायीहरुको छाता संगठन नेपाल मुद्रण उद्योग महासंघले गम्भिर आपत्ति प्रकट गरेको छ । सरकारको एउटा संस्था जोगाउने बहानामा लाखौ विद्यार्थीहरुमाथि खेलवाड गरेको भन्दै चिन्ता व्यक्त गरेको हो ।
संघले आज एक विज्ञप्ति जारी गर्दै जनक शिक्षाले अझैपनि आफ्नो जिम्मेवारी पूरा गर्न नसकेको कारण विद्यार्थीको पठनपाठनमा गम्भिर असर परेको भन्दै यस्तो अवस्थामा पनि निजि क्षेत्रलाई खुम्च्याएर छपाई तथा वितरणको अनुमति नदिएकोले यो भयावह अवस्था आएको बताएको छ ।
उसले निजी क्षेत्रसँग सहकार्य गरेर कम्तीमा कक्षा १ देखि ८ सम्मका पाठ्यपुस्तक छपाइ तथा वितरणको अनुमति दिएमा निजी क्षेत्रले १५ दिनमै देशैभरि पाठ्यपुस्तक विद्यार्थीको हात-हातमा पुर्याउने दाबी गरेको छ ।
२०६४ सालबाट कक्षा १ देखि कक्षा ८ सम्मका सामुदयिक विद्यालयका पाठ्यपुस्तक छपाई तथा वितरणको जिम्मेवारी निजि क्षेत्रले समयमा नै पूरा गरेको सम्झिदै पाठ्यपुस्तक छपाई तथा वितरणमा त्यस पछिका वर्षहरुमा सहजता आएको भए पनि यस वर्ष जनक शिक्षाले खेलवाड गरेको विज्ञप्तिमा उल्लेख गरेको छ।
सोही कार्य गर्न निजि क्षेत्रले गरेको अरवौं रुपैयाको छपाई मेसिन कामको अभावका कारण खालि छन् तर निजि क्षेत्रलाई पाठ्यपुस्तक छपाईमा कक्षा थप गराउन शिक्षा मन्त्रालयमा र मातहतका निकायहरुलाई कयौँ पटक अनुरोध गर्दा पनि हाम्रो कुरा सुनुवाई नभएको महासंघले जनाएको छ।
एउटा सरकारी संस्था जोगाउने वहानामा ९० लाख विद्यार्थीको भविष्यमाथि भएको खेलवाड महासंघलाई किमार्थ स्वीकार्य नहुने बताएको छ।
