बारा- राष्ट्रिय स्वतन्त्र पार्टी (रास्वपा) बारा जिल्लाको विस्तारित बैठकका क्रममा तनाव उत्पन्न हुँदा बारा जिल्लाबाट निर्वाचित चार सांसद बैठक स्थलबाटै निकालिएका छन्।
आज कलैयामा आयोजित बैठकमा बारा जिल्लाका प्रतिनिधिसभा सदस्य रहबर अन्सारी, अरबिन्द साह, गणेश धिमाल र चन्दन सिंह सहभागी भएका थिए। बैठकमा उनीहरूले संस्थापक पक्षमाथि दबाब सिर्जना गर्न खोजेको आरोप लागेपछि विवाद चर्किएको सहभागीहरूले बताएका छन्।
विवाद बढ्दै जाँदा आक्रोशित कार्यकर्ताले उनीहरूलाई धक्का दिँदै बैठक स्थलबाट बाहिर निकालेका थिए। स्थिति तनावपूर्ण बनेपछि प्रहरीले हस्तक्षेप गर्दै सांसदहरूलाई सुरक्षित रूपमा बाहिर निकालेको बताइएको छ।
केही दिनअघि मात्रै रास्वपा बारा जिल्ला अध्यक्ष चन्दन स्वर्णकारको पार्टी सदस्यता खारेज गरिएको थियो। त्यसयता जिल्ला संगठनभित्रको विवाद थप चुलिएको देखिएको छ।
घटनापछि रास्वपाभित्र आन्तरिक विवाद व्यवस्थापन र संगठनात्मक एकतामाथि प्रश्न उठ्न थालेको छ।
