काठमाडौं – राष्ट्रसङ्घीय सुरक्षा परिषद्ले सन् १९४८ मा पश्चिम एसियामा पहिलो पटक शान्ति स्थापना अभियान सुरु गरेको सम्झनामा शुक्रबार राष्ट्रसङ्घीय शान्ति सैनिक दिवस मनाइँदै छ।
यस अवसरमा कर्तव्यपालनका क्रममा ज्यान गुमाएका दुई नेपाली शान्ति सैनिकलाई मरणोपरान्त सम्मान प्रदान गरिने भएको छ।
ललितपुरस्थित राष्ट्रसङ्घीय कार्यालयका अनुसार न्युयोर्कमा रहेको संयुक्त राष्ट्रसङ्घको प्रधान कार्यालयमा जुन १ (जेठ १८) मा आयोजित विशेष कार्यक्रममा महासचिव एन्टोनियो गुटरेसले शान्ति सैनिकहरूको सम्मानमा पुष्पचक्र अर्पण गर्नेछन्।
कार्यक्रममा विश्वभरका शान्ति अभियानमा ज्यान गुमाएका ६८ सैनिक, प्रहरी तथा नागरिक कर्मचारीलाई मरणोपरान्त ‘ड्याग ह्यामर्शोल्ड पदक’ प्रदान गरिनेछ। यस वर्ष उक्त पदकबाट नेपाली शान्ति सैनिक सुरज लामिछाने र देवीराम जैसी लाई मरणोपरान्त सम्मान गरिने भएको छ।
संयुक्त राष्ट्रसङ्घीय शान्ति मिसनमा सबैभन्दा धेरै सुरक्षाकर्मी परिचालन गर्ने मुलुक नेपाल रहेको छ। हाल नेपालबाट ३६४ महिलासहित चार हजार ३०० भन्दा बढी सैनिक तथा प्रहरी कर्मचारी विभिन्न शान्ति अभियानमा कार्यरत छन्।
नेपालले दशकौँदेखि संयुक्त राष्ट्रसङ्घीय शान्ति स्थापना अभियानमा सक्रिय योगदान दिँदै आएको छ र नेपाली शान्ति सैनिकहरूले विश्व शान्ति कायम राख्न महत्वपूर्ण भूमिका निर्वाह गर्दै आएका छन्।
