काठमाडौं – राष्ट्रिय मानव अधिकार आयोग ले जेनजी आन्दोलनसम्बन्धी अनुसन्धान प्रतिवेदन सार्वजनिक गर्दै नेपाल प्रहरीका आईजीपी (तत्कालीन एआईजी) दानबहादुर कार्की सहित विभिन्न सुरक्षा निकायका अधिकारीमाथि विभागीय कारबाही गर्न सरकारसमक्ष सिफारिस गरेको छ ।
आयोगले तत्कालीन एआईजी कार्कीसँगै प्रहरी नायव महानिरीक्षक ओमबिक्रम राणा, वरिष्ठ प्रहरी उपरीक्षक विश्व अधिकारी, तत्कालीन अतिरिक्त सशस्त्र प्रहरी महानिरीक्षक नारायणप्रसाद पौडेल, सशस्त्र प्रहरी उपरीक्षक जीवन केसी, राष्ट्रिय अनुसन्धान विभागका तत्कालीन निर्देशक कृष्ण खनाल तथा काठमाडौंका तत्कालीन प्रमुख जिल्ला अधिकारी छविलाल रिजाल लाई मानवअधिकार उल्लंघन गरेको ठहर गर्दै विभागीय कारबाही गर्न सिफारिस गरेको हो ।
त्यस्तै, भदौ २३ गते नयाँबानेश्वर र संसद् भवन क्षेत्रमा खटिएका नेपाल प्रहरी, सशस्त्र प्रहरी बल तथा राष्ट्रिय अनुसन्धान विभागका फिल्ड कमाण्डरहरूमाथि समेत विभागीय कारबाही गर्न आयोगले सरकारलाई सिफारिस गरेको जनाएको छ ।
