चितवन राइनोजलाई पराजित गर्दै काठमाडौँ गोर्खाजले सिद्धार्थ बैंक नेपाल प्रिमियर लिग (एनपीएल) को अन्तिम चारमा पुग्ने सम्भावना जिवितै राखेको छ।
कीर्तिपुरस्थित त्रिवि क्रिकेट मैदानमा शुक्रबार काठमाडौँले चितवनलाई ५३ रनले पराजित गरेको हो। एनपीएलको पाचौँ खेलमा काठमाडौँले तेस्रो जित दर्ता गरेको छ।
तीन खेलमा जित र दुई खेलमा हार भोगेको काठमाडौँ ६ अंकसहित तेस्रो स्थानमा उक्लेको छ। जितसँगै काठमाडौँको ‘प्लेअफ’ खेल्ने सम्भावना बलियो बनेको छ।
काठमाडौँले साविक विजेता जनकपुर बोल्ट्सलाई पाँच विकेटले हराउँदै एनपीएलको सुरुवात गरेको थियो। दोस्रो खेलमा भने सुदूरपश्चिम रोयल्ससँग २९ रनले र तेस्रो खेलमा विराटनगर किंग्ससँग पाँच विकेटको हार व्यहोरेको थियो।
