नेपाली राष्ट्रिय महिला भलिबल टोली काठमाडौँमा जारी काभा महिला भलिबल च्याम्पियनसिप २०२६ को सेमिफाइनलमा प्रवेश गरेको छ।त्रिपुरेश्वरस्थित राष्ट्रिय खेलकुद परिषद्को बहुउद्देश्यीय कभर्डहल मा आइतबार भएको खेलमा मालदिभ्सलाई ३–० को सोझो सेटमा पराजित गर्दै नेपालले अन्तिम चारमा स्थान सुरक्षित गरेको हो।
नेपालले समूह चरणको अन्तिम खेलमा मालदिभ्सलाई २५–१२, २५–९ र २५–२० ले हरायो। लगातार दोस्रो जितसँगै नेपालले अंक तालिकामा ७ अंक जोडेको छ। भारत ५ अंकसहित दोस्रो स्थानमा रहँदा किर्गिस्तान ३ अंकमा तेस्रो स्थानमा छ। मालदिभ्सले भने समूह चरणमा कुनै अंक जोड्न सकेन।
अब सोमबार हुने भारत र किर्गिस्तानबीचको खेलले सेमिफाइनल पुग्ने अर्को टोलीको टुङ्गो लगाउनेछ। भारत सोझो सेटमा पराजित भए किर्गिस्तान सेमिफाइनलमा पुग्नेछ।नेपालले समूह चरणको पहिलो खेलमा भारतसँग ३–२ को सेटमा हार बेहोरेको थियो। त्यसपछि दोस्रो खेलमा किर्गिस्तानलाई ३–० को सोझो सेटमा हराउँदै पुनरागमन गरेको थियो।
आइतबारकै पहिलो खेलमा ईरानले श्रीलंकालाई २५–१६, २५–१३ र २५–११ ले पराजित गर्यो। दोस्रो खेलमा कजाकस्तानले बंगलादेशलाई ३–० को सेटमा हरायो। सोमबार च्याम्पियनसिपअन्तर्गत तीन खेल हुनेछन्। पहिलो खेलमा बंगलादेश र श्रीलंका, दोस्रो खेलमा भारत र किर्गिस्तान तथा अन्तिम खेलमा ईरान र कजाकस्तान आमनेसामने हुनेछन्।
नेपालको जितमा कप्तान निरुता ठगुन्ना उत्कृष्ट खेलाडी घोषित भइन्।
