काठमाडौँ — मनसुन सक्रिय भएसँगै देशका विभिन्न स्थानका खेतबारी र सिमसार क्षेत्रमा भ्यागुताको आवाज गुञ्जिन थालेको छ। धान रोपाइँको तयारी भइरहेका बेला खेतका आलि तथा पानी जम्ने स्थानमा भेला भएका भ्यागुताले ‘ट्वार–ट्वार’ आवाज निकाल्न थालेका हुन् ।
वर्षायाम भ्यागुताको प्रजननकाल भएकाले यो समयमा तिनको गतिविधि बढ्ने गर्दछ। पानी परेपछि चिस्यानयुक्त वातावरण अनुकूल हुने भएकाले भ्यागुताहरू खेतका आलि, पोखरी र सिमसार क्षेत्रमा सक्रिय देखिन्छन्। विशेषगरी साँझपख र रातिको समयमा उनीहरूको सामूहिक स्वरले वातावरण गुन्जायमान बनाउने गरेको छ।
विज्ञहरूका अनुसार भ्यागुताको उपस्थितिले वातावरणीय सन्तुलन कायम राख्न मद्दत गर्छ। कीरा–फट्याङ्ग्रा नियन्त्रणमा महत्वपूर्ण भूमिका खेल्ने भ्यागुतालाई स्वस्थ पारिस्थितिक प्रणालीको सूचकका रूपमा पनि लिइन्छ।
बर्खासँगै खेतका आलिमा सुनिने भ्यागुताको ‘ट्वार–ट्वार’ आवाजले किसानलाई धान रोपाइँको मौसम आएको संकेत मात्र दिँदैन, प्रकृतिको आफ्नै संगीतको अनुभूति पनि गराउँछ।
