काठमाडौं – राष्ट्रिय स्वतन्त्र पार्टी (रास्वपा)को प्रथम महाधिवेशनबाट रवि लामिछाने सभापतिमा निर्विरोध निर्वाचित भएका छन्। सभापति पदमा उनको मात्रै उम्मेदवारी परेपछि उनी निर्विरोध निर्वाचित भएका हुन्।
निर्वाचन आयोग प्रमुख भुवन केसीले सञ्चारकर्मीसँग कुरा गर्दै सभापति पदमा लामिछानेको एकल उम्मेदवारी परेको जानकारी दिए। उनका अनुसार केन्द्रीय समिति सदस्य पदका लागि भने उम्मेदवारी दर्ता प्रक्रिया जारी रहेको छ।
महाधिवेशनको कार्यतालिकाअनुसार आज अबेर रातिसम्म मनोनयन दर्ता हुने र भोलि बिहान निर्वाचन प्रक्रिया सञ्चालन हुने जनाइएको छ।
रास्वपाको पहिलो महाधिवेशनबाट पार्टीको नेतृत्व चयनसँगै आगामी संगठनात्मक संरचना र केन्द्रीय समितिको टुंगो लाग्ने अपेक्षा गरिएको छ।
