बर्दिबास – नेपाली सेनाको श्री मध्य पूर्वी पृतना हेडक्वार्टर, बर्दिबासमा सञ्चालन भएको चारदिने रक्षा संवाददाता अभिमुखीकरण कार्यक्रम सम्पन्न भएको छ।
गत असोज २० गतेदेखि सञ्चालन भएको उक्त कार्यक्रममा सहभागी २१ जना सञ्चारकर्मीलाई समापन समारोहमा पृतनापति उपरथी भुवन खत्रीले प्रमाणपत्र वितरण गर्नुभयो।
सोही अवसरमा लामो समयदेखि मध्य पूर्वी पृतना हेडक्वार्टरअन्तर्गतका जिल्लाहरूमा नेपाली सैनिक रेडियो कार्यक्रम प्रसारण गर्दै आएका नौवटा एफएम रेडियो स्टेसनलाई नेपाली सेनाका जनसम्पर्क तथा सूचना निर्देशकले कदरपत्र प्रदान गरी सम्मान गर्नुभयो।
कार्यक्रममा सहभागी सञ्चारकर्मीलाई नेपाली सेनाका विभिन्न विषयमा जानकारी गराइनुका साथै विपद् प्रतिकार्य तथा समसामयिक विषयमा अन्तरक्रियासमेत गरिएको थियो।
नेपाली सेनाका अनुसार यस किसिमका अभिमुखीकरण कार्यक्रमले देशका विभिन्न स्थानमा कार्यरत सञ्चारकर्मीलाई नेपाली सेनासम्बन्धी समाचार सङ्कलन तथा सम्प्रेषण गर्न सहज बनाउनुका साथै समाचारमा स्पष्टता र तथ्यपरकता कायम गर्न सहयोग पुग्ने विश्वास लिइएको छ।
