रामेछाप- नेपाल इन्जिनियर्स एशोसियसन वाग्मती प्रदेशद्वारा
प्राथमिक स्वास्थ्य केन्द्र मन्थलीलाई स्वाब संकलन बुथ उपलब्ध गराएकाे छ ।
एशाेसियसनले उपलब्ध गराएकाे बुथ रामेछापका प्रमुख जिल्ला अधिकारी रुद्रादेवी शर्माले बिहिबार मन्थली नगरपालिका प्रमुख रमेशकुमार बस्नेतलाई बुथ हस्तान्तरण गर्नुभएकाे हाे । उक्त बुथ प्राथमिक स्वास्थ्य केन्द्र मन्थलीमा रहने गरी उपलब्ध गराइएकाे छ । हस्तान्तरण कार्यक्रममा बाेल्दै प्रमुख जिल्ला अधिकारी रुद्रादेवी शर्माले स्वाब संकलन बुथ नेपालमा नै नेपाली ईन्जिनियरहरुद्वारा तयार भएकाेमा खुसि व्यक्त गर्नु हुँदै जोखिम मोलेर काम गरिरहेका स्वास्थ्यकर्मीकाे सुरक्षाका लागि बुथ उपलब्ध गराएर स्वास्थ्यकर्मीलाई उर्जा थपिदिने काम गरेकाेमा एशाेसियसन प्रति अाभार व्यक्त गर्नु भयाे ।
काेराेना संक्रमण परिक्षणका लागि विरामीकाे स्वाब संकलन गर्नेक्रममा स्वास्थ्यकर्मीकाे सुरक्षाका लागि उक्त बुथकाे उपयुक्त हुने नेपाल इन्जिनियर्स एशोसियसन बाग्मती प्रदेशका कार्यकारिणी समिति सदस्य इन्जिनियर सरोज कार्कीले जानकारी गराउनु भयाे । इन्जिनियर कार्कीले वाग्मती प्रदेशका सबै जिल्लामा बुथ पुर्याउने काम गरिरहेको बताउनुभयो ।
यस अघि एशाेसियसनले जिल्ला स्वास्थ्य कार्यालय रामेछापलाई एक थान स्वाब संकलन बुथ उपलब्ध गराएकाे थियाे ।