- घनश्याम श्रेष्ठ
काठमाडौं – काठमाडौंका सडक बिहीबारदेखि फेरि सुनसान जस्तै देखिएको छ। कोरोना भाइरस संक्रमण उपत्यकामा फैलिएपछि उपत्यकाका ३ वटा जिल्लाका प्रमुख जिल्ला अधिकारीको संयुक्त बैठकले बुधवार राति १२ बजेदेखि निषेधाज्ञा जारी गरेकापछि सडकमा अत्यावश्यक सेवाका बाहेक अन्य सवारी साधन चलेका छैनन् ।
निषेधाज्ञाको बिहीवार पहिलो दिन उपत्यका सबैजसो ठाउँ सुनसान देखिए । अत्यावश्यक सवारीसाधनबाहेक अन्य कुनै पनि सवारीसाधन चलेका छैनन् भने मानिसको आवतजावत ठप्प जस्तै छ ।
सडकमा प्रहरीहरू तैनाथ गरिएका छन् । प्रहरीले एम्बुलेन्स, खाद्यान्न ढुवानी गर्ने गाडी, पत्रकारका सवारीसाधनबाहेक अन्य सवारीसाधनलाई पूर्णरूपमा निषेध गरेको छ ।
तीन महिनासम्म लामो लकडाउन ब्यहोरेका काठमाडौं उपत्यकाबासी कोरोना महामारी नियन्त्रणका लागि फेरि एक पटक घरभित्रै बसेर आफ्नो र उपत्यकाबासीको स्वास्थ्य सुरक्षाका लागि सरकारलाई साथ दिइरहेका छन् ।
निषेधाज्ञालाई अटेर गरेर बाहिर निस्केका सवारीसाधन तथा मोटरसाइकललाई ‘होल्ड सेन्टर’ स्थापना गरेर बिहानदेखि साँझसम्म राख्ने आदेश आएको प्रहरीले जनाएको छ । निषेधाज्ञा उल्लंघन गर्ने एक हजार भन्दा बढी कारबाहीमा परेका छन् ।
