बैतडी- काठमाडौंबाट बैतडी सरुवा भएका प्रहरीमा कोरोना सङ्क्रमण पुष्टि भएको छ। गत साउन २९ गते काठमाडौंबाट बैतडी सरुवा भएका एक प्रहरी जवान र एक अर्का प्रहरी जवानकी ६ महीनाकी छोरीमा पनि कोरोना पुष्टि भएको हो।
हिजो डडेल्धुरा अस्पतालको प्रयोगशालामा गरिएको परीक्षणमा एक प्रहरी जवानसहित जिल्लाका चार जनामा कोरोना पुष्टि भएको कोभिड–१९ सम्पर्क व्यक्ति भुवनप्रसाद जोशीले बताए।
काठमाडौंबाट सरुवा भइ इलाका प्रहरी कार्यालय पाटन आएका ३१ वर्षीय प्रहरी जवान, काठमामाडौंबाट सरुवा भएर जिल्ला प्रहरी कार्यालय आएकी प्रहरी जवानकी ६ महीनाकी छोरी, सुर्नया गाउँपालिकाका ३९ वर्षीय पुरुष र दशरथचन्द नगरपालिका–९ का २६ वर्षीय पुरुषमा कोरोना पुष्टि भएको हो।
कोरोना पुष्टि भएका प्रहरी जवानको सेती प्रादेशिक अस्पताल धनगढीमा उपचार भइरहेको छ भने ६ महिने शिशु आफ्नै आमासँग क्वारेन्टाइनमा रहेकी जिल्ला प्रहरी कार्यालयका प्रवक्ता, प्रहरी निरीक्षक गौरीप्रसाद जैशीले बताए।
यस्तै सुर्नया र दशरथचन्द नगरपालिका–९ का कोरोना पुष्टि भएका पुरुष दुवै जना भारतबाट फर्केर घरमै बसिरहेका स्वास्थ्य कार्यालयका कोभिड–१९ सम्पर्क व्यक्ति जोशीले बताए। रासस
