काठमाडौं- रामेछापमा थप ६ जनामा कोरोना संक्रमण पुष्टि भएको छ । आज बिहिबार स्वास्थ्य मन्त्रालयको नियमित प्रेस ब्रिफिङ कार्यक्रममा प्रवक्ता डा.जागेश्वर गौतमले रामेछापमा थप ६ जनामा कोरोना संक्रमण देखिएको बताएका हुन् । जस मध्ये ५ जना पुरुष र १ जना महिला रहेका छन्।
रामेछापका ६ जनामध्ये रामेछाप नगरपालिकाबाट पठाएका ४ जनाको कोरोना पोजिटिभ देखिएको हो। जसमध्ये रामेछाप नगरपालिका भित्र काम गर्ने एक जना स्वास्थ्यकर्मी र ३ जना क्वारेन्टाइनमा बसेका व्यक्तिलाई कोरोना पुष्टि भएको उनले बताए। अन्य २ जना उपत्यकामा बस्दै आएकाले उनीहरुको काठमाडौंबाट नै स्वाब संकलन गरिएको हो।
कोरोना भाइरस महामारी सुरु भएदेखि बिहीबारसम्म रामेछापका ६८ जनामा संक्रमण पुष्टि भएको छ। स्वास्थ्य तथा जनसंख्या मन्त्रालयका अनुसार रामेछाप स्थायी बसोबाससहित देशका विभिन्न जिल्लामा अस्थायी बसोबास गर्दै आएका ५९ जना पुरुष र ९ जना महिलामा कोरोना भाइरस पोजिटिभ देखिएको हो। जसमध्ये बिहीबारसम्म ३७ जना उपचाररत छन् भने ३१ जना उपचारपछि घर फर्किएका छन्। हालसम्म जिल्लाबाट स्वाब संकलन गरी पठाएकामध्ये ३७ जनाको कोरोना पोजिटिभ आएको छ।
