इन्डियन प्रिमियर लिग (आईपीएल)मा किङ्स इलाभेन पन्जाबले पहिलो जित दर्ता गरेको छ । बिहीबार राति यूएईमा भएको खेलमा पञ्जाबले रोयल च्यालेन्जर्स बैंगलोरमाथि सहज जित दर्ता गरेको हो ।
२ सय ७ रनको लक्ष्य पछ्याएको बैंगलोर १७ ओभरमा १ सय ९ रन बनाएर अलआउट हुँदा पन्जाबले ९७ रनको जित दर्ता गरेको छ। टस हारेर ब्याटिङ गरेको पन्जाबले २० ओभरमा ३ विकेट गुमाएर २ सय ६ रन बनाएको थियो ।
पन्जाबका लागि कप्तान केएल राहुलले ६९ बलमा ७ छक्का र १४ चौका हान्दै १ सय ३२ रनको शतकीय पारी खेले । योसँगै उनी यो सिजनको आईपीएलमा शतक प्रहार गर्ने पहिलो खेलाडी बनेका छन् ।
पन्जाबका लागि मायांक अग्रवालले २६, निकोलस पुरनले १७, करुण नायरले १५ रन जोडे ।बैंगलोरका शिबम डुबेले २ र युजभेन्द्र चाहलले १ विकेट लिएका थिए ।
खेलमा बैंगलोरका लागि वासिङ्गटन सुन्दरले सर्वाधिक ३०, एबी डी भिलियर्सले २८, आरोन फिन्च २० र शिवम डुबे १२ रन जोडे ।
पन्जाबका रवि विश्नोई र मुरुगान आश्विनले तीन–तीन विकेट लिए भने सेलड्रोन कोट्रेलले दुई विकेट लिए । पन्जाबले २ खेलमा २ अंक जोडेको छ । पहिलो खेलमा पन्जाब सन्दीप लामिछानेको टिम दिल्ली क्यापिटल्ससँग पराजित भएको थियो ।
पञ्जाबका कप्तान केएल राहुल ११ करोड रुपैयाँसहित टोलीको सबैभन्दा महँगो खेलाडी हुन् । उनले १४ चौका र ७ छक्काको मद्दतले १ सय ३२ रनको शानदारी पारी खेले । यो सिजनको पहिलो शतक हो । उनको शतकको मद्दतले पञ्जाबले ३ विकेटको क्षतिमा २०६ रन बनायो । राहुलको आईपएलमा दोस्रो शतक हो । योसँगै उनी आईपीएलमा सबैभन्दा ठूलो स्कोर बनाउने भारतीय बनाएका छन् ।
त्यस्तै, आईपीएलमा सबैभन्दा चाँडो २ हजार रन पुरा गर्ने खेलाडी पनि बनेका छन् । उनले ६९ खेलमा ६९ इनिङमा यो कीर्तिमान आफ्नो नाम गरेका हुन् । यो रेकर्ड पहिले सचिन तेन्दुल्करको नाममा थियो ।
