सर्लाहीमा प्रहरी कार्यालय घेराउ गर्न गएको समूह र प्रहरीबीच झडप भएको छ। झडपका क्रममा केही प्रहरी र स्थानीय घाइते भएका छन्।
एक दलित व्यक्तिको हत्याको विषयलाई लिएर नाराबाजी गर्दै गएको समूहले प्रहरी कार्यालयमा ढुंगामुढा गरेको प्रहरीले जनाएको छ। रामनगर गाउँपालिका ७ का ६० वर्षीय महेन्द्र राम गतसाता स्थानीयबीचको झगडामा मारिएका थिए। सोही विषयलाई लिएर स्थानीयले ढुंगामुढा गरेपछि झडप भएको हो।
प्रहरीले घटनामा संलग्न तीनजनालाई घटना भएकै दिन पक्राउ गरेको भएपनि प्रदर्शनकारीले अन्य पनि संलग्न भएको भन्दै प्रदर्शन गरेका हुन्। यस्तै मृतकलाई शहिद घोषणा र १० लाख रुपैयाँ क्षतिपूर्तिको माग गरेको सर्लाहीका प्रहरी प्रवक्ता डीएसपी मदन कुँवरले बताए।
बुधबार प्रदर्शनकारीको ढुंगा लागेर दुई जना डीएसपीसहित २२ जना प्रहरी घाइते भएका छन्। उनीहरुको हात खुट्टामा चोट लागेको र अवस्था सामान्य रहेको डीएसपी कुँवरले बताए।
यस्तै प्रहरीले दुई जना प्रदर्शनकारीलाई नियन्त्रणमा लिएको छ। अहिले प्रदर्शनकारी र प्रशासनबीच छलफल भइरहेको छ।
