काठमाडौँ – सरकारले नेपालमै रासायनिक मल उत्पादन गर्ने उद्योग खोल्ने बारेमा अध्ययन गर्न तीन सदस्यीय अध्ययन समिति गठन गरेको छ । बिहिबारको मन्त्रिपरिषद् बैठकले स्वदेशमै रासायनिक मल कारखाना स्थापना गर्न अर्थमन्त्री विष्णु पौडेलको नेतृत्वमा उद्योगमन्त्री लेखराज भट्ट र कृषिमन्त्री घनश्याम भुसाल सहितको अध्ययन समिति गठन गरेको सरकारका प्रवक्ता पार्वत गुरुङले जानकारी दिए ।
हरेक वर्ष मल अभाव हुदाँ किसानहरु मर्कामा परेको र यस वर्ष बंगलादेशले पैँचोमा समेत मल नदिएपछि सरकारले उक्त निर्णय गरेको हो । सरकारले यस वर्षका लागि तत्काल मल ल्याउने व्यवस्था गर्न कृषि मन्त्रालयलाई निर्देशन दिएको छ । मन्त्रालयलाई टेन्डरबाट नभई जीटुजीका माध्यमबाट मल ल्याउन निर्देशन दिइएको हो ।
यस्तै, सरकारले आयातित पुस्तकमा लगाइएको भन्सार कर हटाउने निर्णय गरेको छ । मन्त्रिपरिषद् बैठकले पुस्तकमा लाग्ने कर हटाउने निर्णय गरेको प्रवक्ता गुरुङले जानकारी दिनुभयो । किताबमा भन्सार लगाइएको भन्दै स्वदेशी प्रकाशकहरू त्यसको विरोध गर्दै आएका थिए । यस्तै, सरकारले देशका विभिन्न १२ स्थानलाई औद्योगिक ग्राम घोषणा गरेको छ ।
मन्त्रिपरिषद बैठकले गण्डकी प्रदेशका ५, प्रदेश १ का ३, कर्णाली प्रदेशका ३ र बागमती प्रदेशका १ स्थानलाई औद्योगिक ग्राम घोषणा गरेको हो । यस्तै सरकारले बलात्कारपछि हत्या गरिएको बझाङकी १२ वर्षीय सम्झना बिकको परिवारलाई ३ लाख आर्थिक सहायता प्रदाने गर्ने भएको छ ।
