प्रयोगकर्ताका गोपनियता संरक्षण र व्यवस्थापन गर्न नसकेको आरोप लागेको सामाजिक सञ्जाल फेसबुकलाई अहिलेसम्मकै सबैभन्दा ठूलो जरिवाना गरिने भएको छ ।
अमेरिकाको संघीय व्यापार आयोग (एफटीसी) ले फेसबुकले ५ अर्ब डलर जरिवाना तिर्ने उल्लेख गरेको छ भने गोपनियता हेर्ने एउटा स्वतन्त्र समिति पनि बनाउनुपर्नेछ ।
यसरी बन्ने समितिमा फेसबुकका संस्थापक तथा प्रमुख मार्क जुकर्बर्गको नियन्त्रण रहने छैन।एफटीसीले राजनीतिक परामर्शदाता कम्पनी क्याम्ब्रिज एनालिटिकाले ७ करोड ८० लाख फेसबुक प्रयोगकर्ताहरूको डेटा प्राप्त गरेको आरोपको जाँच गरेको थियो।
जाँचक क्रममा फेसियल रिकग्निसनु भनिने अनुहार चिनिने प्रविधिलगायतलाई पनि सामेल गरिएको थियो।
कुनै पनि कम्पनीले प्रयोगकर्ताको गोपनीयता उल्लंघन गरेको आरोपमा ५ अर्ब डलर जरिवाना तिरेको पहिलो पटक हो ।
एफटीसीका अध्यक्ष जो सिमोन्सले फेसबुकले हाल गरिरहेको गोपनीयताको उल्लंघनलाई कम गर्न र फेसबुकमा पूर्ण रूपले गोपनीय संस्कृति विकास गर्न ठूलो जरिवाना लगाइएको बताए ।
सन् २०१८ को मार्चमा एफटीसीको उपभोक्ता संरक्षण ब्युरोले फेसबुकमाथि अनुसन्धान सुरु गरेको थियो ।
अनुसन्धानका क्रममा व्यक्तिगत डेटाहरू एउटा अनलाईन क्वीजमार्फत् जम्मा गरेर क्याम्ब्रिज एनालिटिकालाई बिक्री गरिएको पाइएको थियो। जुन डेटा सन् २०१६ मा भएको अमेरिकी राष्ट्रपतीय चुनाव र बेलायतको ब्रेक्जिट जनमतसङ्ग्रहको नतिजा प्रभावित पार्न प्रयोग गरिएको दाबी पनि गरिएको थियो।
यद्यपि २ लाख ७० हजार मानिसले मात्र सो क्वीजमा सहभागिता जनाएका थिए। क्याम्ब्रिज एनालिटिका सहित फेसबुकको पूर्वाधार प्रयोग गरेर अन्य धेरै कम्पनीहरूले पनि फाइदा लिएका थिए।
