काठमाडौं – मकवानपुर घर भई ललिपतुर बस्ने तारा भन्ने सुनिता लामा र काभ्रे घर भई ललिपतुर बस्ने राजेश लामाबीच प्रेम सम्बन्ध थियो । उनीहरुबीचमा विवाह गर्ने निधो पनि भएको थियो । तर, ताराले राजेशसँग विवाह मानेनन् ।
आफूसँग विवाह गर्न नमानेको भन्दै राजेशले ताराको हत्या गरेर फरार रहेका अभियुक्त १२ वर्षपछि पक्राउ परेका छन् । बिहेको कुरा छिने पनि आफूसँग बिहे गर्न नमानेको भन्दै ललितपुरमा २०६४ पुस २७ गते ताराको हत्यापछि राजेश फरार थिए ।
केन्द्रीय अनुसन्धान व्यूरो (सीआइबी) को टोलीले आज राजेशलाई पक्राउ गरेको हो । सीआइबीका प्रमुख डीआइजी निरज शाहीले विगत सात महिनादेखिको अनुसन्धानबाट अभियुक्त लामा पक्राउ गरिएको बताए । स्रोतका अनुसार, राजेश लामा ताराको हत्यापछि मकवानपुरकै एक गाउँमा मःम पसल सञ्चालन गरेर बसेका थिए ।
पक्राउ अभियुक्तबारे थप अनुसन्धान भइरहेको सीआइबीले जनाएको छ ।