काठमाडौं – प्रमुख प्रतिपक्षी कांग्रेसमा महाधिवेशनको मिति तोक्न दबाब परेको छ । सभापति शेरबहादुर देउवाइतर समूहले तत्काल मिति तोक्न माग गरेको हो ।
पार्टीको १४ औं महाधिवेशन आगामी फागुनमा नहुने निष्कर्षमा पुगे पनि कहिलेसम्ममा गर्ने टुंगो लागेको छैन । सभापति देउवा समूह अन्तरिम संरचना बनाएर महाधिवेशन कार्यतालिका बनाउनुपर्ने पक्षमा छ । नेता रामचन्द्र पौडेल पक्ष र कृष्णप्रसाद सिटौला पक्ष भने सीधै महाधिवेशनमा जानुपर्ने अडानमा छन् ।
जारी केन्द्रीय समिति बैठकमा यी दुई विषयमा नेताहरुबीच विवाद देखिएको छ । केन्द्रीय कार्यसमिति बैठकमा बिहीबारदेखि अन्तरिम संरचना र महाधिवेशन कार्यतालिकाबारे छलफल भइरहेको छ ।
कांग्रेसले फागुनमा संघीय संरचनाअनुसारको विधान बनाएको थियो । त्यसअनुरूप पार्टीको संरचना निर्माण हुन सकेको छैन । अन्तरिम संरचना निर्माण नगरेसम्म महाधिवेशनमा जान नसकिने व्यवस्था छ ।
नेताहरूले उक्त व्यवस्था निलम्बन गरी सीधै महाधिवेशनमा जानुपर्ने दबाब नेतृत्वलाई छ । केन्द्रीय सदस्य डा. मीनेन्द्र रिजालले शुक्रबारको बैठकमा विधानको उक्त व्यवस्था निलम्बनको प्रस्ताव गरेका थिए ।
आजको अन्नपूर्ण पोष्ट दैनिकमा नवीन झाले समाचार लेखेका छन् ।
