हेटौंडा – मकवानपुरको हेटौंडा उपमहानगरपालिकामा सवारी दुर्घटनामा परी दुईजनाको ज्यान गएको छ ।
हेटौंडाको बसामाडीमा मोटरसाइकल र ट्रक एकापसमा ठोक्किँदा मोटरसाइकलमा सवार सौरभ सुवेदी तथा अस्मित सुनारको मृत्यु भएको हो । बुधबार साँझ भएको दुर्घटनामा परी घाइते भएका दुवैको उपचारको क्रममा बुधबार राति नै ज्यान गएको मकवानपुर प्रहरीले जनाएको छ ।
हेटौंडाबाट बसामाडीतर्फ जाँदै गरेको ना ३८ प ५३३२ नम्बरको मोटरसाइकल र चितवनबाट हेटौंडातर्फ आउँदै गरेको ना ६ ख १५०० नम्बरको ट्रक महेन्द्र राजमार्गअन्तर्गत हेटौंडा–३ बसामाडीमा एकापसमा ठोक्किएको थियो ।
सुनारको चितवनस्थित पुरानो मेडिकल कलेज तथा सुवेदीको हेटौंडास्थित चुरेहिल अस्पतालमा उपचार गर्दैगर्दा ज्यान गएको जिल्ला प्रहरी कार्यालय मकवानपुरले जनाएको छ ।
