रामेछापका विभिन्न अस्पतालमा रगत अभावले बिरामीलाई सास्ती भएको छ । नेपाल रेडक्रस सोसाइटी रामेछाप शाखाले सञ्चालन गरेको रक्तसञ्चार केन्द्र बन्द भएपछि रगतको अभावमा बिरामीहरु समस्यामा पर्ने गरेका छन् । रगतको अभावमा जिल्लामा उपचार हुनसक्ने विरामीहरुलाई पनि उपचारको लागि काठमाडौं पठाउनु पर्ने बाध्यता छ ।
नेपाल रेडक्रस सोसाइटीले २०७३ साल माघदेखि सञ्चालन गर्दै आएको रक्तसञ्चार केन्द्र बन्द भएपछि जिल्लामा रगतको अभाव भएको हो । रक्तसञ्चार केन्द्रमा रगत खोज्न जाने बिरामीका आफन्त रित्तो हात फर्कने गरेका छन् । सिन्धुली, दोलखा, ओखलढुङ्गालगायत जिल्लाहरुबाट मृगौलाको डायलासिस गर्न आउने बिरामीहरु, रगतको अभावमा समस्यामा पर्ने गरेका हुन् । विशेष गरि सुत्केरी, गर्भवती महिला र दुर्घटनामा परी घाइते भएकाहरु पीडित बनेका छन् । रामेछापको सदरमुकाम मन्थलीमा रहेको तामाकोसी अस्पतालमा प्रत्येक महिना ४ देखि ५ जनासम्म रगत चढाउनु पर्ने बिरामी आउने गर्दछन् ।
