काठमाडौं – नेपाल कम्युनिष्ट पार्टी (नेकपा) दाहाल-नेपाल समूहले आज नेपाल बन्द गरेको छ । उक्त बन्द सफल पार्नको लागि नेकपाका शीर्ष नेताहरु नै सडकमा उत्रिएका छन् । आज विहानको बन्द सफल पार्न उक्त समूहका अध्यक्ष पुष्पकमल दाहाल प्रचण्ड पनि सडकमा निस्किएका छन् । बिहान उनी ललितपुरको सातदोबाटो हुँदै कोटेश्वरमा प्रदर्शनकारी गरेको नाराबाजीमा सहभागी भए।
कोटेश्वर चोकमा प्रचण्ड सहभागी नाराबाजीमा प्रदर्शनकारीले ‘काम चलाउ म्यादी सरकार मुर्दावाद’, ‘असंवैधानिक नियुक्ति खारेज गर’, ‘राष्ट्रघाती होसियार’, ‘गणतन्त्र जिन्दावाद’ ‘केपी तेरो पाराले दु:ख पाए सारा’ले जस्ता नारा लगाएका थिए।
बिहीबार आमहड्तालका क्रममा सडकमा आएका प्रचण्डले सञ्चारकर्मीलाई प्रतिक्रिया दिँदै भने, ‘निरंकुशताविरुद्ध अझै ठूल्ठूला आन्दोलनमा जान्छौँ । सम्भवतः फागुनको पहिलो सातादखि संयुक्त जनआन्दोलन हुन्छ । केपी ओलीको आयु सकिन्छ । निरंकुशताका पक्षपातीलाई बढार्छ ।’
उनले अहिले भएको संघर्ष जनता र लोकतन्त्रको लागि भएको भन्दै प्रतिगमनविरुद्धको आन्दोलनमा जनताले साथ दिन्छन् भन्नेमा आफूहरुको विश्वास रहेको बताए ।
