काठमाडौं – उद्योग वाणिज्य तथा आपूर्तिमन्त्री मातृका यादवले आफूलाई पक्राउ गर्नका लागि तयार रहन सर्लाहीका सिडिओ र एसपीलाई चेतावनी दिएका छन् ।
शनिबार सर्लाहीको दक्षिण–पश्चिम क्षेत्रस्थित गडहियाडुमरियामा आयोजित उखु किसानसँग अन्तरक्रिया कार्यक्रममा बोल्दै मन्त्री यादवले त्यस्तो चेतावनी दिएका हुन् ।
निकट भविष्यमा उखु किसानले चिनी उद्योगीबाट भुक्तानी नपाए आफू समेत किसानको नेतृत्व गरेर सडकमा उत्रने भन्दै उनले त्यस्तो अवस्थामा पक्राउ वा अन्य कारबाही गर्नका लागि तयार रहन सर्लाहीका प्रमुख जिल्ला अधिकारी मोहनबहादुर जिसी र प्रहरी उपरीक्षक गोपालचन्द्र भट्टराईलाई व्यंग्यात्मक शैलीमा चेतावनी दिएका हुन् ।
‘वर्षौंदेखि उखुको पैसा नपाएर पीडित बनिरहेका किसानलाई निकट भविष्यमै चिनी उद्योगीले भुक्तानी नगरे म किसानसँगै सडकमा आउने छु’, मन्त्री यादवले छेउमै रहेका प्रजिअ र एसपीप्रति ईंगित गर्दै भने, ‘त्यस्तो अवस्थामा कानून विपरित भए किसान भन्दा पनि मलाई कारबाही गर्न तयार रहनुस् ।’
मन्त्री यादवले कार्यक्रममा उपस्थित उखु किसानलाई ढाडस् दिँदै निकट भविष्यमै चिनी उद्योगीबाट उखुको पैसा भुक्तानी हुने आश्वासन दिए ।
आजको नागरिक दैनिकमा टंक क्षेत्रीले समाचार लेखेका छन् ।
