काठमाडौं – प्रहरीले न्युज २४ टेलिभिजनका पत्रकार रवि लामिछाने र युवराज कँडेललाई पक्राउ गरेको छ । उनीहरुलाई न्युज २४ को कार्यालयबाट पक्राउ गरेको हो ।
जिल्ला प्रहरी कार्यालय चितवन र काठमाडौं प्रहरी परिसरको टोलीले बिहीबार साँझ पक्राउ गरेको प्रहरी उच्च स्रोतले अन्नपूर्णलाई बतायो ।
उनीहरुलाई आत्महत्यामा दुरुत्साहन गरेको अभियोगमा अनुसन्धानका लागि नियन्त्रणमा लिएको प्रहरीले जनाएको छ । केही दिनअघि चितवनमा आत्महत्या गरेका पत्रकार शालिकराम पुडासैनीको मृत्युको विषयमा अनुसन्धान गर्न प्रहरीले लामिछाने र कँडेललाई पक्राउ गरेको हो ।
पुडासैनीले आत्महत्या गर्नुअघि खिचेको भिडियो बुधबार सार्वजनिक भएको थियो । भिडियोमा शालिकरामले पत्रकार लामिछानेसहित कँडेल र अस्मिता कार्कीका कारण आफू आत्महत्या गर्न बाध्य भएको भिडियो बनाएर आत्महत्या गरेका थिए ।
