उत्तर कोरियाले दक्षिण कोरियासँग आगामी दिनमा वार्ता नगर्ने घोषणा गरेको छ । दक्षिण कोरियाले अमेरिकासँग संयुक्त सैन्य अभ्यास गरेपछि उत्तर कोरियाले थप क्षेप्यास्त्र परीक्षण गर्दै वार्तामा नबस्ने बताएको हो।
दक्षिण कोरिया र अमेरिकाबीच संयुक्त सैन्य अभ्यास भएकोमा उत्तर कोरिया आक्रोशित बनेको छ । उत्तर कोरियाले अमेरिकासँग संयुक्त सैन्य अभ्यास गरेपछि पनि वार्तामा बस्न सकिन्छ भन्ने भ्रम नपाल्न दक्षिण कोरियालाई चेतावनी दिएको छ ।
उत्तर कोरियाको शान्तिपूर्ण एकता समितिको वक्तव्यमा दक्षिण कोरियाली राष्ट्रपति मुन जाए–इनले सन् २०४५ सम्म दुई कोरियाको एकता गरिसक्ने भनेर दिएको भाषणको आलोचना गरेको छ ।
शुक्रवार बिहानै उत्तर कोरियाले दक्षिण कोरियाको पूर्वी तट नजिकै दुईवटा क्षेप्यास्त्र प्रहार गरेको छ । केही साताभित्र उत्तर कोरियाले गरेको यो छैटौं क्षेप्यास्त्र प्रहार हो ।
