भरतपुर – चितवनको भरतपुरमा चर्चित सञ्चारकर्मी रवि लामिछानेका समर्थकले शनिवार पनि प्रदर्शन गरेका छन् ।
प्रदर्शनकारीले प्रहरीमाथि ढुंगा प्रहार गर्ने र प्रहरीको गाडी तोड्फोड गरेका छन् । प्रदर्शनकारीले प्रहरीको बा १ झ १२७१ नम्बरको गाडी तोड्फोड गरेका हुन् ।
अवस्था नियन्त्रणमा लिन प्रहरीले केही सेल अश्रुग्यास प्रहार गरेको छ । शुक्रवार पनि लामिछाने समर्थकले गरेको आक्रमणमा पाँच प्रहरी घाइते भएका थिए ।
शनिवार पनि सयौं प्रदर्शनकारी सडकमा उत्रिएका छन् । प्रदर्शनकारीले रवि लामिछानेलाई पक्राउ गरेकोमा बिरोध गरेका छन् ।
शनिवार नै रवि लामिछाने समर्थक बिरुद्ध भरतपुरमै प्रदर्शन भएको थियो रवि समर्थकको प्रदर्शनले स्वतन्त्र छानविन र न्यायमा प्रभाव पर्ने भन्दै सयौं युवाले जुलुश निकालेका हुन् ।
पत्रकार शालिकराम पुडासैनीको आत्महत्या प्रकरणमा चर्चित सञ्चारकर्मी लामिछानेसहित तीन जना पक्राउ परेपछि हिजो लामिछाने समर्थकले चितवनमा प्रदर्शन गरेका थिए ।
आत्महत्याका लागि दुरुत्साहन गरेको आरोपमा लामिछाने, युवराज कंडेल र रुकु भनिने अस्मिता कार्कीलाई प्रहरीले पक्रेर अनुसन्धान जारी राखेको छ ।
लामिछाने, कंडेल र कार्कीका कारण आफूले आत्महत्या गर्न बाध्य भएको आत्महत्या गरेका पत्रकार पुडासैनीको मोबाइलमा फेला परेको भिडियोमा उल्लेख छ ।
