काठमाडौँ – निषेधाज्ञा जारी भएको आज एक महिना पुगेको छ। काठमाडौँ उपत्यकामा कोरोना संक्रमण बढेपछि सरकारले बैशाख १६ गतेदेखि निषेधाज्ञा जारी गरेको थियो।
सडकमा कतै सुनसान छ भने कतै गाडीको चाप देख्न सकिन्छ। निषेधाज्ञा उल्लंघन गरी सवारीसाधन चलाउनेलाई प्रहरीले एक पटकलाई सम्झाई बुझाई पठाउने गरेको छ भने पटक-पटक अटेरी गर्नेलाई कोभिड-१९ रोकथाम तथा नियन्त्रणका लागि नेपाल सरकार स्वास्थ्य तथा जनसंख्या मन्त्रालयद्वारा तोकिएको मापदण्ड अनुसार कारबाही समेत गर्ने गरेको छ।
निषेधाज्ञा उल्लंघन गर्नेलाई सरकारले एक वर्षसम्म कैद वा ५ लाख रुपैयाँसम्म जरिवाना हुने जनाएको छ ।
विभिन्न जिल्लामा लागू गरिएको निषेधाज्ञा कार्यान्वयनको सिलसिलामा पछिल्लो २४ घण्टामा निषेधाज्ञा उल्लंघन गर्ने १ हजार ८ सय ६ वटा सवारी साधनलाई प्रहरीले नियन्त्रणमा लिएको छ । तीमध्ये ९ सय ४२ वटा गाडी र ८ सय ६४ वटा मोटरसाइकल रहेका छन् ।
कोभिड-१९ रोकथाम तथा नियन्त्रणका लागि नेपाल सरकार स्वास्थ्य तथा जनसंख्या मन्त्रालयद्वारा तोकिएको मापदण्ड उल्लंघन गर्ने ३ सय ३१ जनालाई प्रचलित कानुन बमोजिम ३३ हजार ५ सय रुपैयाँ जरिवाना गरिएको छ । साथै ३ हजार ७ सय ६६ जनालाई रोकी सम्झाई बुझाई छाडिएको छ ।
नेपालमा पछिल्ला केही दिनमा कोरोनाभाइरसको संक्रमण घट्दै गएको छ। स्वास्थ्य तथा जनसंख्या मन्त्रालयको पछिल्लो साताको तथ्यांक हेर्दा नयाँ संक्रमित थपिने क्रम निरन्तर घटेको देखिन्छ।
