काठमाडौं – सत्तारुढ नेपाल कम्युनिस्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ले अराजक समूहको प्रतिवाद गर्न युवा–विद्यार्थीलाई निर्देशन दिएका छन् ।
केही अराजक समूहले संघीय लोकतान्त्रिक गणतन्त्रविरुद्ध सुनियोजित रुपमा अफवाह फैलाउने काम गरेको भन्दै त्यसको प्रतिवाद गर्न पार्टीका युवा–विद्यार्थीलाई प्रचण्डले निर्देशन दिएका हुन् ।
तत्कालीन माओवादीका नेता पोष्टबहादुर बोगटी ‘दिवाकर’ स्मृति दिवसको अवसरमा नेकपाको मुख्यालय धुम्बाराहीमा सोमबार आयोजित कार्यक्रममा प्रचण्डले कलिलै अवस्थामा रहेको लोकतान्त्रिक गणतन्त्रलाई सिध्याउन केही समूह लागिपरेको टिप्पणी गरे ।
‘संघीय लोकतान्त्रिक गणतन्त्र कलिलै छ,’ प्रचण्डले भने, ‘कलिलोमै यसलाई मार्न सकिन्छ कि भनेर प्रतिक्रियावादीहरु लागिरहेका छन् । आजभोलि त्यो प्रयाश भइरहेको छ ।’ उनले यस्ता तत्वलाई पराजित गर्न युवा–विद्यार्थीलाई निर्देशन दिए । ‘परिवर्तनको रक्षा र सुदृढ गर्दै समाजवादतर्फ अघि बढने अठोट गर्नुपर्छ, संकल्प गर्नुपर्छ,’ प्रचण्डले भने, ‘केही अराजक तत्वहरु यो व्यवस्थाकैविरुद्ध लागिपरेका छन । जनतालाई भ्रममा पार्दै हत्केलाले सूर्य छेक्न खोज्ने त्यस्ता अराजक तत्वहरुलाई प्रतिवाद गर्न म युवा–विद्यार्थीलाई विशेष निर्देशन गर्न चाहान्छु ।’
पोष्टबहादुर बोगटीको योगदानको चर्चा गर्दै प्रचण्डले उनी निष्ठावान राजनीतिज्ञ भएको टिप्पणी गरे । ‘प्रेरणा लिनुपर्ने बहुआयामिक ब्यक्तित्वको धनी हुनुहुन्थ्यो बोगटी,’ प्रचण्डले भने, ‘श्रमजीवि बर्गको एउटा भरपर्दाे नेता हुनुहुन्थ्यो ।’
