नेकपा एमालेका वरिष्ठ नेता माधव नेपालले वार्ता टोलीमा आफ्नो समूहबाट प्रतिनिधित्व गर्ने नेताहरुको भूमिकामाथि समेत शंका गर्न थालेका छन् । माधव नेपाल समूहबाट प्रतिनिधित्व गर्ने तर समूहमाथि नै घात गर्ने नेता किन चाहियो भन्ने प्रश्न आज अपराह्न नेपाल निवासमा आफु निकटका नेताहरूसंग छलफलको क्रममा उठाएका हुन् ।
‘माधव नेपाल स्वयंलाई घात गर्ने वार्ता टोलीको सदस्य किन चाहियो ? वार्ता टोलीका सदस्य सार्वभौम होइनन्, उनीहरुले माधव नेपालको समूहलाई प्रतिनिधित्व गरेका हुन्, जब हाम्रो टिम नै वार्ताको टोलीको विपक्षमा उभिन्छ भने त्यो किन चाहियो ?’ बैठकमा सहभागीहरुले नेपाल समक्ष प्रश्न गरेका छन् ।
वार्ता टोलीले गर्ने जस्तासुकै सम्झौता स्वीकार गर्न सांसद र केन्द्रीय सदस्यहरु तयार नरहेको सांसद तथा केन्द्रीय सदस्य मेटमणी चौधरीले बताए । सहअस्तित्व र समानताका आधारमा एकता हुनुपर्ने भन्दै उनीहरुले कार्यदलबाट त्यो सम्भव नरहेको समेत बताएका छन् ।
बैठकका सहभागीहरुले भीम रावल र सुरेन्द्र पाण्डेको भूमिकाप्रति अशन्तुष्ट प्रकट गर्दै उनीहरुले समूहको भावनाविपरित उल्टोपाल्टो सम्झौता गर्न खोजेको आरोप लगाएका थिए । केही नेता सम्झौता गरेर गए पनि देशभरका कार्यकर्ताले माधव नेपाललाई नै साथ दिने भन्दै खुट्टा नकमाउन आग्रह गरिएका बैठकका सहभागीले बताए ।
आइतबार अपराह्न बसेको आफू निकटका नेताहरुसँगको छलफलमा नेता नेपालले अदालतको आदेश प्रभावित हुने गरी कुनै सहमति नगर्ने समेत अडान दोहोर्याएका छन् । कार्यदलको बैठकले ९ बुँदे सहमतिको प्रस्ताव तयार गरे पनि नेपालको अडानले सहमति हुन सकेको छैन । प्रस्तावित बूँदाको भाषामा नेता नेपालले असहमति जनाएका छन् ।
नेपाल पक्षको छलफलमा कार्यदल सदस्य घनश्याम भुसाल पनि कार्यदल बैठक छोडेर आएका थिए ।
नेपालले पावर शेयरिङमा सहमति नभएसम्म ओलीलाई विश्वास गर्न नसकिने आफू निकट नेताहरुलाई बताएर पठाए । त्यसपछि वार्तामा ट्वीस्ट आएको नेताहरुले बताएका छन् । विशेषगरि माधव पक्षधर वार्ता टोली सदस्य घनश्याम भुसाल र रघुजी पन्तले अडान लिएपछि सहमतिमा हस्ताक्षर हुन नसकेको उनीहरूको भनाइ छ ।
