काठमाडौँ – साउन महिनाको सुरुवातसंगै बजारहरु हरियो र पहेलो रङका श्रृंगारका सामाग्रीले रङिन थालेका छन् । साउनमा हरियो पहेलो चुरा, कपडा, मेहेन्दी आदि महिलाहरुले लगाउने गर्छन् । आजभोलि स-साना बालिका, युवती, अधबैंसे नारी हुन या बृद्ध महिला, सबैको नाडीमा काँचका हरिया चुरा सजिएको देख्न पाइन्छ ।
साउन लागेलगत्तै हिन्दु महिलामा छुट्टै उत्साह र उमंग छाएको हुन्छ । रातो, पहेंलो र हरियो चुरापोते तथा कपडामा सजिएका महिलाको मन्दिर र बाटोघाटोमा चहल पहल बढ्ने गर्छ । पछिल्ला वर्षमा साना बालिका र किशोरीमा समेत मेहेन्दी र हरियो चुरा लगाउने क्रेज बढेको देख्न सकिन्छ ।
धेरैले धार्मिक विश्वासमा यसो गरेका हुन्छन् भने कतिले चाहिँ फेसनका रुपमा । खासगरी साउनको सोमबार शिवजीको व्रत र पूजा गर्ने चलन रहेकाले साउन महिनालाई नै महत्वपूर्ण पर्वको रुपमा मनाइएको देख्न सकिन्छ । साउनमा हरियो चुरा लगाएर चोखो भएर वर्त बस्नाले चिताएको पुग्ने जनआस्था रहेको छ ।
कतिपयले हरियो चुरा लगाइसकेपछि चुकाउनु या फुटाउनु हुँदैन भनेर यो महिनाभर होसीयारी अपनाउने गर्दछन् । कहिल्यै हरियो चुरा नलगाउने नारीले समेत चुरा लगाएर बजाउँदै हिँड्दा खुब रमाइलो हुने बताउने गर्छन् । नारीमा यो महिना चुरा लगाउने सोख र होड चलेपछि चुरा पसलको पनि व्यापार फस्टाएको देख्न सकिन्छ ।
साउनमा हरियो, पहेंलो र रातो चुरापोते एवं कपडा लगाउनुको पनि आफ्नै अर्थ छ । हरियोलाई प्रेम र वातावरणको, रातोलाई सौभाग्यको एवं पहेंलोलाई पवित्रताको प्रतीकको रुपमा लिइन्छ । यसकारण पनि साउन महिनामा हरियो, पहेंलो रातो सम्मिश्रण गरी लगाउने चलन बसेको संस्कृतिविदहरु बताउँछन । चुरापोते र कपडासँगै साउन महिनामा हातभरि मेहन्दी लगाउने चलन पनि छ । हत्केलामा जति बढी गाढा मेहन्दीको रंग राख्यो, उति नै बढी श्रीमानको माया पाइन्छ भन्ने धार्मिक विश्वास गर्नेहरु पनि उत्तिकै हुन्छन् ।