कपिलवस्तु – कृष्णनगर नगरपालिका-१ स्थित बढया पोखरीमा लक्ष्मीका मूर्तिहरु विसर्जन गर्ने क्रममा २ पक्षबीच विवाद भई झडप हुँदा कृष्णनगर नगरपालिका-२ स्थित गोलघरमा चिया पसल गरी बस्ने भारत घर भएका १८ वर्षीय सुरज पाण्डेको मृत्यु भएको छ ।
कृष्णनगर नगरपालिका वडा नम्बर १,२ र ३ का विभिन्न स्थानमा रहेका १३ वटा लक्ष्मीका मूर्तीहरु उक्त पोखरीमा बिसर्जन गर्न विगत वर्षमा झैं लैजाने क्रममा बुधबार दिउँसो रुट प्रयोग गर्न नदिएको विषयलाई लिएर कृष्ण नगरपालिका-२ स्थित बसपार्क चोकमा बिहीबार प्रदर्शनकारीले ट्राफिक प्रहरी बिट तोडफोड तथा आगजनी गरेपछि उक्त क्षेत्रमा अनिश्चितकालीन कर्फ्यु आदेश जारी भएको थियो ।
सो क्रममा प्रदर्शनकारीले प्रहार गरेको ढुङ्गा लागेर नेपाल प्रहरी र सशस्त्र प्रहरी बलतर्फ गरी ६ जना सुरक्षाकर्मी घाइते भएको र प्रहरीले सम्झाई बुझाई गर्दा समेत अवस्था असामान्य भएपछि स्थितिलाई नियन्त्रणमा लिने क्रममा प्रहरीद्वारा हवाइ फायर हुँदा प्रदर्शनकारीतर्फका पाण्डेको मृत्यु भएको हो । घाइते सुरक्षाकर्मीहरुलाई उपचारको लागि शिवराज अस्पताल बहादुरगंज पठाइएको र अवस्था सामान्य रहेको छ ।
यस सम्बन्धमा प्रहरीले थप अनुसन्धान गरिरहेको छ ।
