काठमाडौँ– संसद सचिवालयकी महिला कर्मचारीलाई करणी उद्योगको अभियोग लागेका पूर्वसभामुख कृष्णबहादुर महराको शुक्रबार बयान लिइएको छ। बयान लिइए पनि शुक्रबार थुनछेकको बहस भने सुरु भएन।
आइतबार थुनछेक बहस हुने छ। सम्भवत आइतबार नै थुनछेकको आदेश आउने छ। काठमाडौँ जिल्ला अदालतका मुख्य न्यायाधीश सुदर्शन पान्डेको एकल इजलासले थुनछेकको आदेश गर्ने छ। महरालाई पुर्पक्षका लागि थुनामा पठाउने, धरौटी माग्ने वा साधारण तारेखमा छाड्नेमध्ये एउटा आदेश हुने छ।
काठमाडौँ जिल्ला अदालत स्रोतका अनुसार शुक्रबारसम्म महराको पक्षका वकालत गर्न ३० जना कानुन व्यवशायीले वकालत नाम भरेका छन्। रमन श्रेष्ठ, मुरारी सापकोटालगायत कानुन व्यवशायीले महराको पक्षमा वकालत गर्न वकालत नामा भरेको काठमाडौँ जिल्ला अदालत स्रोतले जनाएको छ।
महरानिकट एक कानुन व्यवसायीका अनुसार महराको पक्षमा वकालत गर्न वकालत नामा भर्न सक्ने कानुन व्यवशायीको संख्या अझ बढ्न सक्ने छ। ‘ वकालत नामा धेरैले भरेपनि ५/६ जना मात्र कानुन व्यवशायीले बहस गर्ने तयारी छ’, महरानिकट ती कानुन व्यवसायीले भने।
जिल्ला सरकारी वकिलको कार्यालयले बिहीबार जबरजस्ती करणी उद्योगअन्तर्गत मुद्दा दर्ता गरेपछि काठमाडौँ जिल्ला अदालतमा शुक्रबार महराको बयान दिनभर लिइएको थियो। बयानका क्रममा उनले आफू पीडित भनिएकी महिलाको कोठामा नगएको दाबी गरेका छन्।
