काठमाडौँ – तत्कालीन उपपप्रधान तथा स्वास्थ्य मन्त्रीको जिम्मेवारीमा रहेको समाजवादी पार्टीका अध्यक्ष उप्रेन्द्र यादव सरकारबाट बाहिरिने भएका छन् । प्रधानमन्त्री केपी शर्मा ओलीले आफूखुशि मन्त्रिमण्डल पुनर्गठन गरेको भन्दै यादव सरकारबाट बाहिरिने भएका हुन् ।
आफूहरुसँग कुनै छलफल नगरी ओलीले मन्त्रिमण्डल हेरफेर गरेको भन्दै सो पार्टी रुष्ट बनेको छ । समाजवादी पार्टीका एक नेताले आफ्नो पार्टीसँग कुनै छलफल नगरी ओलीले मनपरी ढंगले मन्त्रिमण्डल पुनर्गठन गरेको भन्दै आपत्ति जनाए ।
ओलीले स्वास्थ्य तथा जनसंख्यामन्त्रीको भूमिकामा रहेका उपेन्द्र यादवलाई कानुनमन्त्रीको जिम्मेवारी दिएका छन् । उनको उपप्रधानमन्त्रीको जिम्मेवारी भने यथावत छ । यस्तै स्वास्थ्य राज्यमन्त्रीको भूमिकामा रहेका सुरेन्द्र चौधरीलाई हटाइएको छ ।
उपप्रधानमन्त्री उपेन्द्र यादव हाल भारतको दिल्ली भ्रमणमा रहेका छन् । उनी दिल्लीबाट फर्किएपछि बैठक बसेर सरकारबाट बाहिरिने बारे निर्णय लिइने बताइएको छ। ओलीले बुधबार साँझ ६ मन्त्री र ३ राज्यमन्त्रीसहित ९ जनाको नयाँ नियुक्ति गर्दै ८ जना मन्त्री तथा राज्यमन्त्रीको बिदाइ गरेका थिए ।
