धादिङ – भैरवी मन्दिर धादिङ जिल्लाको एक प्रसिद्द मन्दिर हो। धादिङ बेशीबाट करिव १८ किलोमिटर दुरीमा रहेको उक्त मन्दिर धादिङको पुरानो सदरमुकाम नीलकण्ठ नगरपालिका–६ सुनौलाबजारमा अवस्थित रहेको छ। समुन्द्र सतहदेखि करिब १५ सय मिटरको उचाइमा रहेको यो मन्दिर क्षेत्र धार्मिक तथा पर्यटकीय हिसाबले निकै महत्वपूर्ण रहेको छ।
भैरवी मन्दिरको अहिले पुननिर्माण काम धामाधम चलिरहेको छ । जिल्लाकै ऐतिहासिक महत्व बोकेको उक्त भैरवी मन्दिर राजा रामशाहको पाला अघि नै शक्ति पिठको रुपमा परिचित रहेको भैरवी मन्दिर संरक्षण तथा पर्यटन विकास समितिका सचिव कृष्ण बहादुर श्रेष्ठले बताए ।
उक्त स्थान भौगोलिक रुपमा उच्च भागमा रहेको छ। सदरमुकामबाट नजिक रहेकोले भक्तालु,पर्यटकहरु दिनप्रतिदिन बढिरहेको र विदाको दिन पिकनिक जानेको संख्या पनि बढेको श्रेष्ठको भनाई छ ।
०७२ सालको भूकम्प कारण क्षेती पुगेको मन्दिरलाई व्यवस्थित बनाई पर्यटकिय क्षेत्रको रुपमा विकास गर्ने उद्धेश्यले २०७० मा भैरवी मन्दिर संरक्षण तथा पर्यटन विकास समिति गठन गरी मन्दिरको पुननिर्माण हुँदै आएको छ ।
भैरवीबाट लाङटाङ, गणेश हिमाल, मानापाथी, घोडाघोडीलगायत हिमालका दृश्यहरू पनि नजिकैबाट अवलोकन गर्न सकिन्छ।
