काठमाडौँ– रिक्त सभामुख पदमा नेकपा संसदीय दलका उपनेता सुवासचन्द्र नेम्वाङले फेरि पनि अवसर पाउने भएका छन्।
सभामुख पूर्वएमालेबाट की पूर्वमाओवादीबाट भन्ने छलफल चलिरहेका बेला नेम्वाङले पाँचौ पटक देशको पाँचौ ठूलो पदको जिम्मेवारी पाउने निश्चिय प्राय भएको हो।
उनी यसअघि २०६३ सालमा पुनस्थापित संसद, रुपान्तरिक संसद, २०६४ सालमा भएको पहिलो संविधानसभा र २०७० मा भएको दोस्रो संविधान सभामा सभामुख भइसकेका छन्।
पार्टी एकता पहिला माओवादी खेमाबाट कृष्णबहादुर महरा सभामुख भएकाले अहिले पनि उक्त खेमबाटै सभामुख चयन हुनुपर्छ भन्ने बहस नेकपाभित्र भए पनि उक्त विषय विस्तारै ओझेल पर्दै आएको नेताहरुको दाबी छ।
अध्यक्षद्वय केपी शर्मा ओली र पुष्पकमल दाहाल प्रचण्ड अन्तिम निर्णय गर्ने भए पनि पार्टीभित्र नेम्वाङलाई नै सभामुख बनाउन लगभग सहमित जुटेको पूर्वमाओवादी खेमाका एक नेताले बताए।
ओली पद रिक्त भएदेखि नै नेम्वाङको पक्षमा रहेपनि अर्का अध्यक्ष दाहाललाई पूर्वमाओवादी खेमाले सभामुख एकतापूर्वको शक्ति सन्तुलन कायम हुनुपर्ने दबाब दिँदै आएका थिए। तर उक्त समूह पनि विस्तारै नेम्वाङकै पक्षमा उभिने अवस्थामा पुगेको दाहाल निकट एक नेताले बताए।
उनले भने, ‘विभिन्न कारणले सुवासजी नै सभामुख बन्नुहुन्छ। पूर्वमाओवादी खेमाबाट उहाँकै पक्षमा सहमति जुट्छ।’
पूर्वमाओवादी पक्षले अग्नि सापकोटालाई सभामुख बनाउनु पर्ने प्रस्ताव गरेको थियो भने उपसभामुख शिवमाया तुम्बाहाम्फेले पनि आफूले सभामुखको जिम्मेवारी पाउनु पर्ने माग राख्दै आएकी छिन्।
नेम्वाङले कसलाई सभामुख बनाउने भन्ने निर्णय दुई अध्यक्षले नै गर्ने भन्दै पन्छिए। मंगलबार सिंहदरबारस्थित कार्यकक्षमा भेटिएका नेम्वाङले हाँस्दै भने, ‘त्यो बारेमा छलफल चलिरहेकै होला। आज भने अरु विषयमा छलफल गर्न मलाई प्रधानमन्त्रीले बालुवाटार बोलाउनुभएको छ।’
प्रचण्ड निकट अर्का नेताका अनुसार नेम्वाङलाई नै सभामुख बनाउन दुई दलले २०७४ मा चुनावी तालमेल गरेर झण्डै दुई तिहाइ बहुमत आएको उत्साहमा प्रचण्डले वचन दिएका थिए। जुन वचन कार्यान्वयन हुन अवसर आएको उनको भनाइ छ।
त्यस्तै अनुभवी र पार्टीभित्र एकताको सन्देश दिन पनि नेम्वाङ उपयुक्त पात्र भएको ती नेताको जिकिर छ।
गएको असोजमा तत्कालीन सभामुख महरामाथि संसद सचिवालयकै एक महिला कर्मचारीमात्रि जबरजस्ती करणी गरेको आरोप लागेपछि पदबाट राजीनामा दिएका थिए। संसदको हिउँदे अधिवेशन पुस ४ गते सुरु भएको र अर्को बैठक ११ गतेका लागि बोलाइएको छ।
उक्त बैठकले सम्भवत पुस १३ गते सभामुखको चुनाव गर्ने गरी कार्यतालिका आउने संसद सचिवालय स्रोतको भनाइ छ। ११ गतेको बैठकअघि नेकपाले निर्णय गर्नेछ।
सभामुख र उपसभामुख दुवै एउटै पार्टीबाट हुन नहुने संवैधानिक व्यवस्थाका कारण बहालवाल उपसभामुख तुम्बाहाम्फेले पदबाट राजीनामा दिनेछिन्। उनले मंगलबार संसद बैठक सुरु हुने बेलासम्म आफूले राजीनामा दिने केही पत्रकारहरुसँग बताएकी छिन्।
मंगलबार उपेन्द्र यादव नेतृत्वको समाजवादी पार्टी नेपालले सरकार छाडेसँगै तुम्बाहाम्फे कानुनमन्त्री भन्ने सम्भावना बढेको छ।
