काठमाण्डौ – विमानस्थलको प्रहरी नेपालको प्रतिबिम्ब भएकाले कानुन कार्यान्वयमा निर्दयी र बोली बचन नम्र, शिष्ट व्यवहार प्रदर्शन गर्न र सुरक्षाको दृष्टिकोणले अतिसंवेदनशिल क्षेत्र भएकाले सुरक्षाको विषयमा कुनै सम्झौता नगरी गम्भिर भएर लाग्न महानगरीय प्रहरी कार्यालयका प्रमुख प्रहरी नायव महानिरीक्षक विश्वराज पोखरेलले कर्मचारीहरूलाई निर्देशन दिएका छन् ।
सोमबार त्रिभुवन विमानस्थल सुरक्षा कार्यालयको निरिक्षण तथा निर्देशन कार्यक्रमलाई सम्बोधन गर्दै सो कुरा वताएका हुन् ।
कार्यक्रमलाई सम्बोधन गर्दै पोखरेलले नेपाल सरकारले घोषणा गरेको “नेपाल भ्रमण वर्ष २०२०” मा नेपाल भित्रने र बाहिरिने पाहुनाहरूको उलेख्य रूपमा वृद्धी हुने र उनिहरूको पहिलो दृष्टि विमानस्थलमा खटिने कर्मचारीहरू मध्ये नेपाल प्रहरीमा पर्ने हुनाले, बोली बचन, आचरण व्यवहारमा नम्रता र कानून कार्यान्वयनमा निर्दयिता अपनाउन निर्देशन दिए ।
प्रहरीको एउटा सानो कमजोरीले ठुलो दुर्घटना हुन सक्ने भएकोले त्यस तर्फ विशेष सतर्क रहन आग्रह गरे । विमानस्थलमा खटिने एक कर्मचारीको गल्तीले समग्र संगठन वेला वेलामा बदनाम हुदै आएको भन्दै कुनै लोभ लालचमा नपरी आर्थिक अनियमितता नगर्न निर्देशन दिए । कानूनले निषेधित गरेका कुराहरू डिउटीमा खटिएको कुनै पनी कर्मचारीले रोक्ने अधिकार भएकाले आफ्नो मान्छे हो भनी छाड्न कोहि कसैले दवाव दिएमा त्यस्तालाई कारवाही गर्ने चेतावनी दिए ।