आज माघे संक्रान्ति पर्व परम्परागत रुपमा देशभर स्नान, दान धार्मिक कार्य गरी मनाइदैछ । आजदेखि सूर्य धनु राशिबाट मकर राशिमा प्रवेश गर्ने भएकाले यस पर्वलाई मकर संक्रान्ति पनि भनिन्छ ।
आजदेखि ६ महिनासम्म यूर्य उत्तरायणमा प्रवेश गर्ने र धार्मिक मान्यताअनुसार सूर्य उत्तरायण भएको समय यज्ञ, दान आदि धार्मिक विधिका लागि शुभ मानिने भएकोले शुभ कर्महरु पनि यसै बेला गर्ने परम्परा छ । माघे संक्रान्तिको अवसरमा आज बिहानैदेखि भक्तजनहरु नदी, तलाउ, त्रिवेणी, कुण्ड तथा जलाशयमा मकर स्नान गरिरहेका छन् । आजको दिन विशेष गरी देवघाट, वराहक्षेत्र, रिडी, कन्काई लगायतका स्थानहरुमा ठूलो मेला लागेको छ ।
स्नान, दान तथा पूजा गरिएपछि आआफ्नो घरमा तिलको लड्डु, तरुल, घीउ, चाकु, खिचडी, सेलरोटीलगायतका परिकार खाने चलन छ ।
आज थारु बहुल क्षेत्रमा माघी पर्वको छुट्टै चहलपहल बढेको छ । पश्चिमी तराईका बाँके बर्दिया, दाङ, कैलाली, कञ्चनपुर लगायतका जिल्लाहरुमा बसोबास गर्ने थारू समुदायमा नयाँ वर्ष आरम्भका रुपमा मनाइने ‘माघी’ पर्वको आज बिहानैदेखि चहलपहल सुरु भएको छ ।
माघे सङ्क्रान्तिको अघिल्लो दिन सुरु भई ३ दिनसम्म मनाइने माघी पर्वका बेला थारु समुदायमा गाउँको मूलघरमा भेला भई खानपिन गरी रमाइलो गर्ने चलन छ । माघीलाई थारुसमुदायले आफ्नो घर सल्लाह गर्ने पर्वका रुपमा समेत मनाउने गर्दछन् । माघीमा दाजुभाइ एक ठाउँमा बसेर खानपिन गर्दै घर सल्लाह गर्ने गरिन्छ । घर सल्लाहमा कसलाई के जिम्मेवारी दिने, घरको मूली को बन्नेजस्ता कुराको छलफल हुन्छ । थारु समुदायले माघीमा गाउँको अगुवा (महतवा) समेत परिवर्तन गर्ने गर्दछन् ।
यसैबीच नेपालका मगर जातिले पनि माघे संक्रान्तिलाई मुख्य पर्वको रुपमा धुमधामसँग मनाउने चलन छ । माघे संक्रान्तिलाई मगर समुदायले तीन दिनसम्म धुमधामका साथ चेलीबेटी पुज्ने र पितृ पूजा गर्ने पर्वका रुपमा मनाउने गर्दछन् ।
यसैगरी सिन्धुलीको कमलामाई स्थान, काभ्रेको त्रिवेणीघाट पनौती र दोलालघाटमा माघी नुहाउने भक्तजनहरुको बिहानैदेखि घुइँचो लागेको छ । यस्तै चितवनको देवघाट, पाल्पा, गुल्मी र स्याङ्जाको संगम स्थल रुरु (रिडी) क्षेत्रमा पनि मेला लागेको छ ।
