प्रतिनिधिसभाको बुधबार बस्ने बैठकको सम्भावित कार्यसूचीमा अमेरिकी सहायता परियोजना एमसीसी समावेश भएन। संघीय संसद सचिवालयले मंगलबार निकालेको सम्भावित कार्यसूचीमा एमसीसी नपरेको हो।
संसद सचिवालयका महासचिव डा. भरतराज गौतमले निकालेको सम्भावित कार्यसूचीमा विभिन्न दुई विषय समावेश गरिएका छन्। जसमा प्रधानमन्त्री शेरबहादुर देउवाले ‘थारु आयोगको तेस्रो वार्षिक प्रतिवेदन आ.व. २०७७/०७८’ पेश गर्ने पहिलो कार्यसूची रहेको छ।
त्यस्तै दोस्रो कार्यसूचीमा सभामुख अग्नि सापकोटालले विभिन्न शोक प्रस्तावहरु प्रस्तुत गर्ने गौतमले बताएका छन्। तर दलहरुबीच सहमति भइनसकेकाले सम्भावित कार्यसूचीमा एमसीसीलाई नराखिएको हो।
त्यस्तै सभामुख अग्नि सापकोटाले प्रतिनिधि सभा कार्यव्यवस्था परामर्श समितिको बैठक बोलाएका छन् । बुधबार बिहान ११ः३० बजे परामर्श समितिको बैठक बोलाएको सभामुख सापकोटाको सचिवालयले जनाएको छ ।
बुधबार दिउँसो १ बजे प्रतिनिधि सभा बैठक बोलाइएको छ । त्यसअघि परामर्श समितिको बैठक बोलाइएको हो । एमसीसीमा दलहरुबीच राष्ट्रिय सहमति नबन्दा यसअघि पटक पटक प्रतिनिधि सभा बैठक स्थगित हुदै आएको थियो ।
मंगलबार प्रधानमन्त्री शेरबहादुर देउवाले सभामुख सापकोटालाई फोन गरी कार्यव्यवस्था परामर्श समितिको बैठक बोलाउन आग्रह गरेका थिए । उक्त बैठकमा एमसीसी टेबुल गर्ने, नगर्नेबारे छलफल हुने ठानिएको छ।
एमसीसीसहितका विषयमा छलफल गर्न बुधबार बिहान माओवादी केन्द्रको संसदीय दल बैठक बस्दैछ। कांग्रेस संसदीय दलको मंगलबारको बैठकले एमसीसी संसदमा लैजाने निर्णय लिइसकेको छ।