काठमाडौं – चीन फैलिएको कोरोना भाइरसको जोखिमले नेपालमा मास्कको अभाव भएको छ ।
कोरोना भाइरसबाट जोगिन सबैभन्दा सुरक्षित मानिने एन ९५ नामक मास्कमात्रै नभएर साधारण पेपर मास्कको समेत बजारमा अभाव देखिएको हो । मास्क बिक्रेताका अनुसार, कोरोना भाइरस देखिनु अघि मास्कको माग खासै थिएन। तर, पछिल्लो एक सातामा सामान्य र एन ९५ मास्कको माग अत्यधिक बढेको छ।
मास्क अभाव हुन् थालेपछि बजारमा केहि व्यापारीहरुले भने कालो बजारीको फाइदा उठाउदै दोब्बर महँगो मूल्यमा मास्क बेच्न थालेका छन्। कम्पनीबाट मास्क आउनै छाड्यो भन्दै दोब्बर मूल्यमा बेच्न थालेका हुन्।
मास्कको माग बढेसँगै स्टक पनि सकिएको क्षेत्रपाटी स्थित एक फर्मामा कार्यरत कर्मचारीले जानकारी दिए। बजारमा पाइने निलो र हरियो रंगका मास्क अभाव नै भइसकेको छ। अहिले चिनियाँहरुले प्रयोग नगर्ने कालो र सेतो रंगको मास्क मात्र नेपाली बजारमा विक्री भइरहेको उनले बताए ।
नेपालमा मास्क उत्पादन गर्ने तीन वटा मात्रै कम्पनी छन्। यी सबै कम्पनीले साधारण पेपर मास्क मात्र उत्पादन गर्छन्। कोरोना भाइरसबाट जोगिन उपयुक्त मानिने एन ९५ मास्कको उत्पादन चीनमा हुन्छ। चीनबाटै नेपाल आयात गरिँदै आएको एन ९५ मास्क पछिल्ला दिनमा नेपाल भित्रिएको छैन।
एक कार्टुनमा दुई हजार पिस मास्क हुन्छ। नेपालमा आठ सयको हाराहारीमा सर्जिकल व्यवसायी छन्। तर कोरोना भाइरसको संक्रमण बढेसँगै मास्कको माग बढेको छ।
