काठमाडाैं – पछिल्लो छ महिनामा महानगरीय ट्राफिक महाशाखाले २० हजार ४५७ जनालाई मादक पदार्थ सेवन (मापसे) गरी चलाउने चालकलाई कारवाही गरको छ ।
दैनिक विशेष सचेतना अन्तर्गत आम सडक प्रयोगकर्तालाई सुरक्षित सडक प्रयोग अन्तर्गत २० हजारभन्दा धेरैलाई सचेतना कक्षा दिएको महानगरीय प्रहरी ट्राफिक महाशाखाले आज (आइतवार) पत्रकार सम्मेलन गर्दै जानकारी दिएको हो ।
यसबाहेक लेन अनुशासन उल्लंघन गर्ने २३ हजार ५ सय ७ जना, सवारी दुर्घटना गर्ने चालक २ सय ५५ जना, चालक सह–चालक १ हजार ९ सय ५९ जना, मन्त्रालय, अन्य सरकारी कार्यालय तथा संघ संस्थाका व्यक्ति १ हजार ८ सय ४६ जना, कलेजका विद्यार्थीहरू ६ हजार १ सय ११ र सुरक्षित यात्रा अभियानमा ६ हजार १ सय ८२ जना गरी हालसम्म जम्मा ६० हजार ३ सय १७ जनालाई सचेतना कक्षा प्रदान गरेको महानगरिय ट्राफिक महाशाखाले जनाएको छ ।
महाशाखाले सचेतना सँगसँगै ट्राफिक नियम उल्लङ्घन गर्ने सवारी चालकहरूलाई पुस १ गतेदेखि नै ३ महिने विशेष मोबाइल कारवाही अभियान शुरू गरेको थियो । जसअन्तर्गत सडकमा सवारी तथा पैदलयात्रीहरूलाई आवत जावतमा अवरोध हुने गरी पार्किङ गर्ने ४ हजार २ सय १८, जथाभावी सवारी मोड्ने १ हजार ८०, ढोका खुल्ला ३ हजार ८ सय ६, एकतर्फी (वान वे) मा चलाउने ८ सय ४१, जथाभावी हर्न बजाउने ८ सय ८, लेन अनुशासन पालना नगर्ने ७ सय ९९, जथाभावी पिक एण्ड ड्रप गर्ने ३ हजार ५ सय ६६ र अन्य ६ हजार ३ सय ४२ गरी जम्मा २० हजार ४३३ सवारी चालकहरूलाई कारवाही गरेको महानगरिय प्रहरी महाशाखाका प्रमुख वरिष्ठ प्रहरी उपरीक्षक (एसएसपी) भिम प्रसाद ढकालले बताए ।
