काठमाडौं – प्रधानसेनापति प्रभुराम शर्माका भाइ लक्ष्मीराम शर्मा नागार्जुन नगरपालिका–४ को वडाध्यक्षमा निर्वाचित भएका छन्।
नेपाली कांग्रेसबाट उम्मेदवार बनेका शर्मा यस अघि आफूलाई पराजित गरेका एमालेका करुणकुमार बलामीलाई हराउँदै वडाध्यक्षमा निर्वाचित भएका हुन्।
२०७४ को स्थानीय निर्वाचनमा पनि उम्मेदवार बनेका प्रधानसेनापति शर्माका कान्छा भाइ लक्ष्मी एमालेका उम्मेदवार बलामीसँग ७९ मतले पराजित भएका थिए।
बलामीले ९१६ मत पाएका थिए भने शर्माको ८३७ मत आएको थियो। पाँच वर्षपछि २०७९ मा उनै बलामीलाई ४०६ मतान्तरले हराएर शर्माले बाजी मारे। विजयी शर्माले १३६१ मत पाउँदा पराजित बलामीको ९५५ मत पाए।
नागार्जुन ४ मा अघिल्लो चुनावमा एमालेले प्यानल नै जितेको थियो भने यो पटक दलित महिला सदस्य नै पाएन। त्यहाँ कांग्रेसको तर्फबाट उम्मेदवार बनेकी शोभा नेपाली निर्विरोध निर्वाचित भइन्। नागार्जुन चारमा यसपटक भने कांग्रेसको प्यानल नै विजयी भएको छ।
महिला सदस्यमा शोभा मगर निर्वाचित हुँदा सदस्यहरु सुन्दरमणि श्रेष्ठ र बालकृष्ण ढुंगाना कांग्रेसबाट विजयी बने।
