ऐश्वर्य श्रेष्ठ – अन्तर्राष्ट्रिय जलरंग समाज नेपालले ४ दिने ‘पोखरा आर्ट क्याम्प’को आयोजना गर्ने भएको छ । चार देशिय कार्यशालामा नेपाल बंगलादेश, इरान र भारतको सहभागिता रहनेछ । “पोखरा घुमौ र पोखराको प्राकृतिक सौन्दर्यलाई चित्रण गरौं ” भन्ने मुल नाराका साथ आगामी भाद्र ३१ देखि असोज ४ गतेसम्म कार्यक्रम आयोजना गर्ने International Watercolor Society Nepal (IWS Nepal) ले जनाएको छ ।
आज चक्रपथस्थित मार्थ थकाली होटलमा आयोजित पत्रकार सम्मेलनमा ‘आईडब्लुएस’ नेपालका अध्यक्ष एनबि गुरुङ्गले ४ देशका करिब ८० जना कलाकारको सहभागिता रहने जानकारी दिए । उक्त ४ दिने कार्यक्रममा सामूहिक कला सिर्जना, कलाको प्रत्यक्ष चित्रण र सिकाई तथा पोखराको रमणीय स्थानको प्रत्यक्ष स्थलगत भ्रमण गरी चित्रण गरिनेछ ।
अध्यक्ष गुरुङ्गले सो कार्यक्रमले पोखराको पर्यटन विकास र प्रर्वद्धनमा टेवा दिनका साथै पोखरालाई विश्व माझ कलामार्फत चिनाउन सहयोग गर्ने बताए ।
पत्रकार सम्मेलनमा जनसाँकृतिक महासंघका महासचिव तथा प्राज्ञ लालकाजी लामा, बरिष्ठ कलाकार डिराम पाल्पाली, राष्ट्रिय ललितकला संघका अध्यक्ष दिपेन्द्रमान बनेपाली, ललितकला पत्रकार समाजका अध्यक्ष तथा कलाकार केशबराज खनाल, चित्रकार बाबु साइला लगायतका कलाकारको उपस्थिती रहेको थियो ।
आईडब्लएस नेपालले यस अघि सन २०१६ र २०१८ मा काठमाडौं, घान्द्रुक र लुम्बिनीमा अन्र्तराष्ट्रिय कलाको प्रद्र्धशनी गरीसकेको छ ।
